ევროკავშირის ელჩის საქართველოში, პაველ ჰერჩინსკის განცხადებით, საქართველო ევროკავშირის კანდიდატი ქვეყანაა მხოლოდ სახელწოდებით, რადგან ქვეყანაში ფუნდამენტური ღირებულებების მიმართულებით უკუსვლა გრძელდება. 2026 წლის გაფართოების ანგარიშის წარდგენის შემდეგ გამართულ შეხვედრაზე ელჩმა აღნიშნა, რომ ევროკავშირის გაფართოების პროცესი დემოკრატიას, კანონის უზენაესობასა და ადამიანის უფლებებს ეფუძნება, ამ მიმართულებებით კი საქართველოში მდგომარეობა კიდევ უფრო გაუარესდა.

ჰერჩინსკის შეფასებით, მიუხედავად ხელისუფლების სიტყვიერად გამოხატული სურვილისა, მონტენეგროს, ალბანეთის, უკრაინისა და მოლდოვასგან განსხვავებით, საქართველო ევროპულ გზას შორდება. ელჩმა გამოეხმაურა პრემიერ-მინისტრ ირაკლი კობახიძის განცხადებებს ევროკავშირთან დიალოგის განახლების შესახებ და აღნიშნა, რომ ევროკავშირი დიალოგისა და კომპრომისისთვის მზადაა, თუმცა ბოლო სამი წლის განმავლობაში „ქართულმა ოცნებამ“ დიალოგს შინაარსი გამოაცალა.

მისი თქმით, დიალოგის აღდგენას ხელს უშლის დემოკრატიული უკუსვლა, სამოქალაქო საზოგადოებაზე ზეწოლა, დამოუკიდებელი მედიის წინააღმდეგ მიმართული მოქმედებები, ოპოზიციური პარტიების აკრძალვის მუქარა და ყოველდღიური ანტიევროპული გაშავების კამპანია. ელჩმა ხაზგასმით აღნიშნა, რომ სანამ ევროკავშირის წინააღმდეგ მიმართული რიტორიკა და ბრალდებები არ შეწყდება, შინაარსიანი საუბარი ვერ შედგება.

გარდა ამისა, ჰერჩინსკიმ დიდი შეშფოთება გამოთქვა საკონსტიტუციო სასამართლოში მიმდინარე პროცესის გამო, რომლითაც მთავარი ოპოზიციური პარტიების აკრძალვაა მოთხოვნილი. მისი თქმით, ეს ევროპის საბჭოს ისტორიაში უპრეცედენტო ნაბიჯი იქნება. ელჩმა ასევე ისაუბრა სასამართლო სისტემის დამოუკიდებლობის უკუსვლაზე, შერჩევითი და არაპროპორციული სასჯელებით დაკავებული პირების გათავისუფლების აუცილებლობაზე და ე.წ. გამჭვირვალობის კანონზე, რომელიც, მისი შეფასებით, არ შეესაბამება ევროპულ სტანდარტებს.