რუსეთის უშიშროების საბჭოს მდივანმა და ყოფილმა თავდაცვის მინისტრმა სერგეი შოიგუმ „ქართული ოცნების“ ხელისუფლება შექო იმისთვის, რომ მან, მისი მტკიცებით, 2024 წელს „პროდასავლური ქართული ოპოზიციის მიერ ინიცირებული სახელმწიფო გადატრიალება“ აღკვეთა. რუსული მედიის ცნობით, ამის შესახებ შოიგუმ დსთ-ს წევრი ქვეყნების უშიშროების საბჭოების მდივნების მე-14 ყოველწლიურ შეხვედრაზე განაცხადა.

რუსეთის საინფორმაციო სააგენტო Interfax-ზე დაყრდნობით, შოიგუმ აღნიშნა, რომ საქართველოს ხელისუფლებამ ქვეყნის ეროვნული ინტერესების დაცვის პოლიტიკა დაიწყო. მან ასევე მიესალმა საქართველოსა და რუსეთს შორის სავაჭრო-ეკონომიკური თანამშრომლობის განვითარებას და ხაზგასმით აღნიშნა, რომ რეგიონული პრობლემები პოლიტიკური და დიპლომატიური გზებით, გარე ძალების ჩარევის გარეშე უნდა მოგვარდეს.

სერგეი შოიგუმ ყურადღება გაამახვილა სამხრეთ კავკასიაში არსებულ ვითარებაზე და „3+3“ საკონსულტაციო რეგიონული პლატფორმის მუშაობის განახლება მოითხოვა. აღნიშნული ფორმატი 2021 წელს შეიქმნა და სამი სამხრეთკავკასიური ქვეყნის, ასევე რუსეთის, თურქეთისა და ირანის მონაწილეობას ითვალისწინებს. მიუხედავად იმისა, რომ საქართველომ რუსეთთან არსებული პოზიციის გამო ამ ფორმატში მონაწილეობაზე უარი განაცხადა, რუსი მაღალჩინოსნები თბილისს ინიციატივაში ჩართვისკენ რეგულარულად მოუწოდებენ.

აღსანიშნავია, რომ შოიგუს განცხადებები ემთხვევა მმართველი პარტიისა და საქართველოს ხელისუფლების წარმომადგენელთა ნარატივებს, რომლებიც ანტისამთავრობო პროტესტებს, მათ შორის 2024 წლის ნოემბერში მომხდარ აქციებს, რევოლუციურ სცენარებად და გადატრიალების მცდელობებად აფასებდნენ.