რუსეთსა და უკრაინას შორის განხორციელებული ღამის საპასუხო იერიშების შედეგად, გავრცელებული ინფორმაციით, სულ მცირე ოთხი ადამიანი დაიღუპა. Al Jazeera-ს ცნობით, ოფიციალური წყაროების განცხადებით, რუსეთის თავდასხმამ უკრაინის საპორტო ქალაქ ოდესაზე სამი ადამიანის სიცოცხლე შეიწირა, ერთი პირი კი მძიმედ დაშავდა.

თავის მხრივ, უკრაინულმა დრონებმა იერიში მიიტანეს რუსეთის ლენინგრადის ოლქში მდებარე „კირიშის“ ნავთობგადამამუშავებელ ქარხანაზე, რომელიც ქვეყანაში სიდიდით მეორეა. რეგიონის გუბერნატორ ალექსანდრ დროზდენკოს თქმით, თავდასხმის შედეგად ჩამოვარდნილი დრონის ნამსხვრევებმა ერთი ქალის სიცოცხლე იმსხვერპლა, საცხოვრებელი კორპუსი კი დაზიანდა. გუბერნატორის განცხადებით, საჰაერო თავდაცვის ძალებმა რეგიონში 113 უკრაინული დრონი ჩამოაგდეს. უკრაინული მხარის ცნობით, დარტყმის სამიზნე ასევე გახდა სანქტ-პეტერბურგის სიახლოვეს მდებარე „მოროზოვის“ ქარხანა, რომელიც რაკეტებისთვის საწვავსა და ფეთქებად ნივთიერებებს აწარმოებს.

უკრაინის ენერგეტიკის სამინისტროს მონაცემებით, გასული კვირის განმავლობაში რუსეთმა უკრაინის ენერგოსექტორზე 128 იერიში მიიტანა. უკრაინის პრეზიდენტმა ვოლოდიმირ ზელენსკიმ განაცხადა, რომ ქვეყნის მრავალი ქალაქი და თემი რთული ვითარების წინაშე დგას ელექტროენერგიის, წყლისა და გათბობის მიწოდების კუთხით. ზელენსკის თქმით, ევროკომისიის პრეზიდენტ ურსულა ფონ დერ ლაიენთან შეთანხმებით, შეიქმნება ახალი საგანგებო მექანიზმი, რომელიც უკრაინას ევროპული ფონდების უფრო სწრაფად მიღების საშუალებას მისცემს.

იმავდროულად, აბუ-დაბიში დაგეგმილ მოლაპარაკებებთან დაკავშირებით, კრემლის პრესსპიკერმა დიმიტრი პესკოვმა განაცხადა, რომ შეხვედრა შეერთებული შტატების შუამავლობით რუსეთსა და უკრაინას შორის ტრილატერალურ ფორმატში წარიმართება.