თურქეთის პრეზიდენტმა რეჯეფ თაიფ ერდოღანმა აზერბაიჯანიდან დაბრუნებისას ჟურნალისტებს განუცხადა, რომ აშშ-ის პრეზიდენტ დონალდ ტრამპთან ბოლო პერიოდში გამართული საუბრებისას ირანის წინააღმდეგ შესაძლო ახალი ომის საფრთხეებზე ისაუბრა. Hürriyet Daily News-ის ცნობით, ერდოღანმა ხაზგასმით აღნიშნა, რომ ანკარა ორივე მხარესთან აწარმოებს დიალოგს რეგიონში ესკალაციის თავიდან ასაცილებლად.

„ჩვენ არ გვინდა, რომ ირანის წინააღმდეგ თავდასხმების ახალი ტალღა დაიწყოს და ჩვენი რეგიონი მეტ არასტაბილურობაში ჩაითრიოს. ჩვენ ყოველთვის ვამბობთ, რომ პრობლემების მოგვარება დიპლომატიითა და დიალოგითაა შესაძლებელი“, — აღნიშნა თურქეთის ლიდერმა და დასძინა, რომ თურქეთი მზადაა მშვიდობისა და დიპლომატიის კარის გასახსნელად ჩაერთოს ამ პროცესში.

მისივე თქმით, რეგიონული კონფლიქტი მხოლოდ მოწინააღმდეგე მხარეებზე არ აისახება და მისი ფასი ვრცელდება თურქეთიდან სპარსეთის ყურის ქვეყნებამდე, ერაყამდე, სირიამდე, ევროპასა და აზიაში.

გარდა ამისა, აზერბაიჯანიდან დაბრუნებისას პრეზიდენტმა რუსეთსა და უკრაინას შორის ომის დასრულების ძალისხმევაზეც ისაუბრა და აღნიშნა, რომ თურქეთი მზადაა, საჭიროების შემთხვევაში, სტამბოლი მოლაპარაკებების ცენტრად კვლავ აქციოს.