მიხეილ ყაველაშვილმა კაზინოებისთვის საერთაშორისო ტურნირებზე საგადასახადო შეღავათების დაწესებას ხელი მოაწერა, რის შემდეგაც კანონი ძალაში შევიდა. „ლატარიების, აზარტული და მომგებიანი თამაშობების შესახებ“ კანონში ცვლილებები პარლამენტმა დაჩქარებული წესით მიიღო იმ დროს, როდესაც ბათუმში საკონსტიტუციო სასამართლო პოლიტიკური პარტიების აკრძალვის საქმეს განიხილავდა.

გამოცემის ცნობით, ინიციატორთა არგუმენტად ტურიზმის წახალისება სახელდება, თუმცა ეს მიზეზი არასაკმარისად მიიჩნია პოლიტიკური პარტიებისა და სამოქალაქო ორგანიზაციების ნაწილმა. „ნაციონალურმა მოძრაობამ“ საქართველოს მოქალაქეებისთვის კაზინოებში თამაშის მთლიანად აკრძალვაც მოითხოვა. კანონთან დაკავშირებით პროტესტი გამოხატა საპატრიარქომაც — საზოგადოებასთან ურთიერთობის სამსახურის უფროსის, ანდრია ჯაღმაიძის განცხადებით, პარლამენტმა კანონი ისე სწრაფად მიიღო, რომ კითხვის დასმაც ვერ მოასწრეს.

ახალი კანონის თანახმად, თუ ტურნირის მონაწილეთა 80% ან მეტი უცხო ქვეყნის მოქალაქეა და საპრიზო ფონდი 3 მილიონ ლარს აჭარბებს, საერთაშორისო ტურნირის ორგანიზატორს „სათამაშო ბიზნესის მოსაკრებლის შესახებ“ კანონის საფუძველზე კლუბის მაგიდისთვის დაწესებული მოსაკრებლის გადახდა აღარ მოუწევს. ცნობისთვის, პირველი მოსმენით მიღებული ვარიანტი 70%-იან დაშვებას ითვალისწინებდა. გარდა ამისა, Netgazeti-ს ინფორმაციით, აზარტული თამაშების ბრუნვამ 2025 წელს 89 მილიარდ ლარს მიაღწია, რაც მთლიანი ბრუნვის ერთ მესამედზე მეტია.