საქართველოს ახალგაზრდა იურისტთა ასოციაცია (საია) ევროკომისიის მიერ გამოქვეყნებულ 2026 წლის გაფართოების ანგარიშს ეხმაურება და აცხადებს, რომ დოკუმენტი საქართველოში ადამიანის უფლებებისა და დემოკრატიის მიმართულებით არსებულ მძიმე მდგომარეობას და უკუსვლას კიდევ ერთხელ წარმოაჩენს. ორგანიზაციის ცნობით, ასახული პრობლემები ადასტურებს იმ რეალობას, რომელზეც ადგილობრივი უფლებადამცველები და საერთაშორისო მექანიზმები ბოლო სამი წელია საუბრობენ.

საიას შეფასებით, ევროკომისიის ანგარიშში განსაკუთრებული ყურადღება ეთმობა რეპრესიულ საკანონმდებლო ცვლილებებს, შეკრებისა და გამოხატვის თავისუფლების შეზღუდვას, ჟურნალისტებისა და სამოქალაქო საზოგადოების საქმიანობისთვის შექმნილ საფრთხეებს, საპოლიციო ძალადობის შემთხვევების არასათანადო გამოძიებას, თვითნებურ დაკავებებსა და არაპროპორციულ სასჯელებს. დოკუმენტი ასევე მიუთითებს სასამართლო სისტემის დამოუკიდებლობისა და მიუკერძოებლობის გაუარესებაზე, აგრეთვე თანასწორობისა და დისკრიმინაციის აკრძალვის მიმართულებით არსებულ გამოწვევებზე.

ორგანიზაცია ყურადღებას ამახვილებს ევროკომისიის რეკომენდაციებზე, რომლებიც შეეხება თვითნებურად დაკავებული პირების გათავისუფლებას, ფუნდამენტური უფლებების შემზღუდველი კანონების გაუქმებას, სამართალდამცველთა მხრიდან ძალადობის შემთხვევების ეფექტიან გამოძიებასა და მედიის თავისუფლების უზრუნველყოფას. საია მიიჩნევს, რომ სახელმწიფომ უნდა გაითვალისწინოს ევროკომისიის რეკომენდაციები და შეწყვიტოს ადამიანის უფლებებისა და დემოკრატიული პრინციპების ხელყოფის ქმედებები.

„საქართველოს კონსტიტუციის 78-ე მუხლით გათვალისწინებული ევროპული ინტეგრაციის ვალდებულებისა და კონსტიტუციის მეორე თავითა და საერთაშორისო ხელშეკრულებებით ნაკისრი ადამიანის უფლებათა დაცვის ვალდებულებების შესასრულებლად, ევროპული კომისიის რეკომენდაციების გათვალისწინება უნდა მოხდეს და უნდა შეწყდეს ადამიანის უფლებებისა და დემოკრატიული პრინციპების ხელმყოფი ქმედებები“, – აღნიშნულია საიას განცხადებაში.