სომხური მედიის ცნობით, აშშ-ის სახელმწიფო მდივნის თანაშემწემ ევროპისა და ევრაზიის საკითხებში ბრენდან ჰანრაჰანმა, სომხეთის საგარეო საქმეთა და საერთაშორისო ვაჭრობის მინისტრის მოადგილემ ვაჰან კოსტანიანმა და აზერბაიჯანის საგარეო საქმეთა მინისტრის მოადგილემ ელნურ მამედოვმა მულტიმოდალური სატრანზიტო მარშრუტის „ტრამპის გზა საერთაშორისო მშვიდობისა და კეთილდღეობისთვის“ (TRIPP) წინ წაწევის მიზნით სამმხრივი ტექნიკური დაგეგმარების ჯგუფების მუშაობის დაწყების შესახებ განაცხადეს.

„არმენპრესის“ ცნობით, სომხეთის საგარეო საქმეთა სამინისტროში აცხადებენ, რომ ეს ფორმატი აერთიანებს სამი ქვეყნის პოლიტიკის შემმუშავებლებსა და ტექნიკურ ექსპერტებს ერთობლივი მუშაობისა და რეგიონში გრძელვადიანი სტაბილურობის, ეკონომიკური სიცოცხლისუნარიანობის, რეგიონული ურთიერთდაკავშირებულობისა და სავაჭრო კეთილდღეობის უზრუნველყოფის ხელშეწყობის მიზნით. სამინისტროს განცხადებით, ეს ფაქტი კიდევ ერთხელ ადასტურებს აშშ-ის პრეზიდენტ დონალდ ტრამპის შუამავლობით 2025 წლის 8 აგვისტოს გამართული მშვიდობის სამიტის ფუძემდებლური დეკლარაციის მნიშვნელობას.

მხარეები შეთანხმდნენ სამმხრივი ტექნიკური დაგეგმარების პირველი ორი ჯგუფის ამოქმედებაზე ტრანსპორტისა და ელექტროენერგიის გადაცემის მიმართულებით. უწყების ცნობით, ტექნიკური დაგეგმარების ამ ჯგუფების ფორმირება მნიშვნელოვანი ნაბიჯია რთული ტექნიკური საკითხების გადასაჭრელად და განხორციელების შემდგომ ეტაპებზე გადასასვლელად, მათ შორის სხვა რეგიონულ ინფრასტრუქტურებთან კავშირის უზრუნველყოფის თვალსაზრისით.

სამინისტროს ინფორმაციით, მხარეებმა კიდევ ერთხელ დაადასტურეს შესაბამისი ვალდებულებები, რათა უზრუნველყონ TRIPP-ის ყველა კომპონენტის ამოქმედება მაქსიმალურად შემჭიდროებულ ვადებში.