რუსეთმა სომხეთი კოლექტიური უსაფრთხოების ხელშეკრულების ორგანიზაციის (კსთო) შესახებ გადაწყვეტილებებზე პასუხისმგებლობის გადაბრალების მცდელობაში დაადანაშაულა. ეს განცხადება მას შემდეგ გაკეთდა, რაც მოსკოვის ლიდერობით მოქმედმა სამხედრო ალიანსმა ერევნისთვის ხმის მიცემის უფლების შეჩერების განხილვა დაიწყა გადაუხდელი საწევრო გადასახადების გამო.

Azatutyun-ის ცნობით, სომხეთი 2022 წლიდან აიგნორებს კსთო-ს ღონისძიებებს მას შემდეგ, რაც ორგანიზაცია სომხეთის სუვერენული ტერიტორიის წინააღმდეგ აზერბაიჯანის აგრესიის დროს დახმარების აღმოჩენაში დაადანაშაულა. 2024 წლის თებერვალში ერევანმა ორგანიზაციაში წევრობა „გაყინა“ და საწევრო შენატანების გადახდაც შეწყვიტა. რუსეთის საგარეო საქმეთა მინისტრის მოადგილემ ალექსანდრე პანკინმა განაცხადა, რომ მიუხედავად ბოიკოტისა, სომხეთი ორგანიზაციის სრულუფლებიან წევრად რჩება და გადაწყვეტილებების მიღებაში მონაწილეობის შესაძლებლობა კვლავ ღიაა.

თავის მხრივ, კსთო-ს გენერალურმა მდივანმა თალატბეკ მასადიკოვმა აღნიშნა, რომ რუსეთმა წარადგინა პროექტი სომხეთისთვის ხმის მიცემის უფლებისა და კვოტებით გათვალისწინებული თანამდებობების კანდიდატების წარდგენის უფლების შეჩერების შესახებ. საკითხი მოსკოვში, 11 ნოემბერს დაგეგმილ სამიტზე უნდა განიხილონ.

სომხეთის პრემიერ-მინისტრმა ნიკოლ ფაშინიანმა აგვისტოდან მოყოლებით რამდენჯერმე განაცხადა, რომ ერევანი წინააღმდეგი არ იქნება, თუ კსთო სომხეთის გარიცხვას გადაწყვეტს, თუმცა ორგანიზაციიდან ოფიციალური გასვლის შესახებ განცხადება არ გაუკეთებია. გასულ კვირას მან აღნიშნა, რომ ალიანსის მიმართ სომხეთის ინტერესი „ამოწურულია“ და აქტიური მონაწილეობის განახლებას არ აპირებენ.