სომხეთმა, აზერბაიჯანმა და აშშ-მა ოფიციალურად გამოაცხადეს სამმხრივი ტექნიკური დაგეგმვის ჯგუფების ამოქმედების შესახებ, რომლებიც მიზნად ისახავენ „ტრამპის მარშრუტის“ პროექტის წინ წაწევას. OC Media-ს ცნობით, 7 ნოემბერს გავრცელებულ განცხადებაში სამმა ქვეყანამ ეს ნაბიჯი შეაფასა, როგორც გადამწყვეტი ნაბიჯი რთული ტექნიკური საკითხების მოსაგვარებლად.

აღნიშნული მრავალფუნქციური ინფრასტრუქტურული პროექტი, რომელიც აზერბაიჯანის ძირითად ტერიტორიას სომხეთის გავლით ნახჭევანის ექსკლავთან აკავშირებს, მხარეებმა 2025 წლის აგვისტოში, ვაშინგტონის სამიტზე შეათანხმეს. ახალი ჯგუფების პრეზენტაცია სომხეთის საგარეო საქმეთა მინისტრის მოადგილემ ვაჰან კოსტანიანმა, აზერბაიჯანის საგარეო საქმეთა მინისტრის მოადგილემ ელნურ მამედოვმა და აშშ-ის სახელმწიფო მდივნის თანაშემწემ ევროპისა და ევრაზიის საკითხებში ბრენდან ჰენრაჰანმა გამართეს.

მხარეები შეთანხმდნენ პირველი ორი სამმხრივი დაგეგმვის ჯგუფის გახსნაზე, რომლებიც ტრანსპორტისა და ელექტროგადამცემი ხაზების საკითხებზეა ორიენტირებული. ოქტომბრის ბოლოს სომხეთის პარლამენტმა, მმართველი პარტიის მხარდაჭერით, დაამტკიცა აშშ-თან სტრატეგიული თანამშრომლობის ჩარჩო შეთანხმება, რომელიც ამ პროექტს ეხება. ოპოზიციამ დოკუმენტს მხარი არ დაუჭირა და მიუთითა შესაძლო რისკებზე, მათ შორის აზერბაიჯანთან სამშვიდობო ხელშეკრულების გაფორმების პროცესთან დაკავშირებით.

ჩარჩო შეთანხმების მიხედვით, TRIPP Development Company-ში, რომელიც პროექტის განვითარებასა და მართვაზეა პასუხისმგებელი, აშშ 74%-იან წილს ფლობს, ხოლო სომხეთი — დარჩენილ 26%-ს.