ამერიკულმა ტექნოლოგიურმა კომპანია Nvidia-მ კვირას განაცხადა, რომ შეისწავლის გავრცელებულ ინფორმაციას იმის შესახებ, რომ მისი გენერალური დირექტორი, ჯენსენ ჰუანგი, შესაძლოა უცხოური სადაზვერვო ძალების სამიზნე ყოფილიყო. მედიის ცნობით, ამერიკული დაზვერვა ფლობდა ინფორმაციას ჰუანგის რომანტიკული ურთიერთობის შესახებ ჩინელ ქალთან, რომელიც, წყაროების თანახმად, ჩინეთის სახელმწიფო უსაფრთხოების სამინისტრომ გადაიბირა.

როგორც ცნობილია, საქმე ეხება სინგაპურში დაფუძნებული კომპანია Megaspeed-ის აღმასრულებელს, ალის ჰუანგს. გამოცემების ცნობით, ამერიკული მხარე იძიებს აღნიშნულ კომპანიას იმის დასადგენად, ეხმარებოდა თუ არა ის პეკინს საექსპორტო შეზღუდვების გვერდის აფლასა და ხელოვნური ინტელექტის უახლესი ჩიპების მიღებაში.

კვირას გავრცელებულ განცხადებაში Nvidia-ს დირექტორთა საბჭომ აღნიშნა, რომ მიუხედავად იმისა, რომ მათ არ აქვთ იმის საფუძველი, იფიქრონ, რომ ეროვნული უსაფრთხოება ან კომპანიის საიდუმლოებები კომპრომეტირებულია, დამოუკიდებელი დირექტორების კომიტეტი დამოუკიდებელი იურისტების დახმარებით ყოვლისმომცველ გამოძიებას ჩაატარებს. საბჭოს განცხადებით, ჯენსენ ჰუანგი სრულად უჭერს მხარს აღნიშნულ შემოწმებას და თანამშრომლობს მასთან, გამოძიების მიმდინარეობისას კი ის თანამდებობაზე დარჩება.

იმავე დღეს კომპანიის თანამშრომლებისთვის გაგზავნილ ელექტრონულ წერილში 63 წლის ჰუანგმა აღიარა, რომ მეუღლისა და ოჯახის მიმართ უპატიოსნოდ მოიქცა. მისი თქმით, მის ქმედებებს გამართლება არ აქვს და იგი ღრმად ნანობს მომხდარს. მან ასევე განაცხადა, რომ მზადაა დაიცვას კომპანია და მხარი დაუჭიროს ამერიკის ეროვნულ უსაფრთხოებას.

მოვლენებმა აშშ-ის კონგრესში ორპარტიული გამოხმაურება გამოიწვია. კანონმდებლებმა ჰუანგს კონგრესში წარდგენისა და ახსნა-განმარტებების მიცემისკენ მოუწოდეს. თავის მხრივ, ვაშინგტონში ჩინეთის საელჩომ უარყო რაიმე კავშირი ჯაშუშობის ბრალდებებთან.