საუდის არაბეთის დედაქალაქის ცენტრალურ ფინანსურ უბანში მდებარე ცათამბჯენი Aramco Tower-ი საჰაერო თავდასხმის შედეგად დაზიანდა. ჰუსიტების კონტროლს დაქვემდებარებულმა საინფორმაციო სააგენტო Saba-მ დაადასტურა, რომ დაჯგუფებამ ერ-რიადის ბიზნესზონა სამიზნეში ამოიღო, თუმცა Aramco Tower-ი სახელწოდებით არ უხსენებია. საუდის არაბეთის ენერგიის სამინისტროს განცხადებით, შენობამ მხოლოდ „მცირე ზიანი“ განიცადა და არავინ დაღუპულა ან დაშავებულა.

მიუხედავად ოფიციალური განცხადებისა, BBC Verify-ის მიერ გადამოწმებული კადრები აჩვენებს, რომ შენობას უფრო მასშტაბური დაზიანება აღენიშნება — სარაკეტო ან დრონით დარტყმის შედეგად სულ მცირე ერთი სართული მძიმედ დაზიანდა, ხოლო ერთზე მეტ დონეზე ფანჯრები ჩაიმსხვრა. იემენში მოქმედმა შეიარაღებულმა დაჯგუფებამ ასევე განაცხადა, რომ ცალკეული დარტყმების სამიზნე გახდა ერ-რიადის აეროპორტი და Aramco-ს ნავთობსაცავები. თავის მხრივ, საუდის არაბეთის ხელისუფლება აცხადებს, რომ ქვეყნის საჰაერო თავდაცვამ რამდენიმე რაკეტა ჩამოაგდო.

აღნიშნული თავდასხმები იემენში განხორციელებული საჰაერო იერიშების ფონზე მოხდა. ჰუსიტების მტკიცებით, საუდის არაბეთის ხელმძღვანელობით მოქმედმა კოალიციამ იემენზე მიტანილი იერიშებით ათობით ადამიანი იმსხვერპლა, რასაც საპასუხო ზომები მოჰყვა. საუდის არაბეთისა და ჰუსიტების კონფლიქტი, რომელიც ათ წელზე მეტია გრძელდება, ბოლო პერიოდში კიდევ უფრო გამწვავდა მას შემდეგ, რაც არაფორმალური ზავი დაირღვა.