ისრაელის პრეზიდენტმა ისააკ ჰერცოგმა გადი აიზენკოტს მთავრობის ფორმირება ოფიციალურად დაავალა. Deutsche Welle-ს ცნობით, ცენტრისტული პარტია „იშარის“ ლიდერს კოალიციის შესაქმნელად 28 დღე ექნება, პრეზიდენტს კი მანდატის 14 დღით გახანგრძლივების უფლებამოსილება გააჩნია.

პრეზიდენტმა ჰერცოგმა განაცხადა, რომ აიზენკოტმა ქნესეთის წევრების უმრავლესობისგან ყველაზე მკაფიო მხარდაჭერა მიიღო. ოქტომბრის არჩევნებზე „იშარი“ ისრაელის მეორე უდიდესი პარტია იყო 21 საპარლამენტო ადგილით, ხოლო მოქმედი პრემიერ-მინისტრის, ბენიამინ ნეთანიაჰუს „ლიქუდმა“ 27 ადგილი მოიპოვა. მიუხედავად ამისა, ქნესეთის მეტმა წევრმა სწორედ აიზენკოტს დაუჭირა მხარი. კერძოდ, აიზენკოტმა 67 რეკომენდაცია მიიღო, ხოლო ნეთანიაჰუს 46 დეპუტატმა დაუჭირა მხარი.

საკუთარ გამოსვლაში გადი აიზენკოტმა აღნიშნა, რომ ის ეროვნული ერთიანობის მთავრობის ჩამოყალიბებისკენ ისწრაფვის და ქნესეთის ყველა წევრს ოფიციალური მიმართვით მიმართავს. თავის მხრივ, პრეზიდენტმა ისააკ ჰერცოგმა აღნიშნა, რომ ქვეყანას სტაბილური მთავრობა სჭირდება ისეთი გამოწვევების დასახვედრად, როგორიცაა ირანის საფრთხეები, ღაზაში ტრამპის 20-პუნქტიანი გეგმა და ლიბანთან მოლაპარაკებები.

თუ აიზენკოტი კოალიციის შექმნას ვერ შეძლებს, პრეზიდენტს უფლება ექნება, ეს ამოცანა ქნესეთის სხვა წევრს გადასცეს, სადაც რიგით მეორე კანდიდატად ბენიამინ ნეთანიაჰუ მოიაზრება. იმ შემთხვევაში, თუ ვერც ნეთანიაჰუ და ვერც სხვა პარლამენტარი შეძლებენ მთავრობის ჩამოყალიბებას, ისრაელი შესაძლოა, რიგგარეშე არჩევნებამდე მივიდეს.