ეგვიპტეში, გიზას პროვინციაში მომხდარი მატარებლების შეჯახების შედეგად, ბოლო მონაცემებით, სულ მცირე შვიდი ადამიანი დაიღუპა და 100-ზე მეტი დაშავდა. BBC-ის ცნობით, ერთ-ერთი მატარებლის მძღოლი დაღუპულებს შორის არის.

როგორც ქვეყნის რკინიგზის უწყება და მედია იტყობინება, ინციდენტი მაშინ მოხდა, როდესაც გიზადან ფაიუმის მიმართულებით მოძრავი მატარებელი კაიროდან ასუანის მიმართულებით მიმავალ და რელსებზე მდგარ სხვა შემადგენლობას უკანა მხრიდან შეეჯახა. შეჯახების შედეგად რამდენიმე ვაგონი რელსებიდან გადავიდა და ნაპირს გადაიყირავა.

შემთხვევა ალ-აიათის რაიონში, კაფრ ამმარსა და ალ-რაქკას სადგურებს შორის მოხდა. ადგილზე ათობით სასწრაფო დახმარების მანქანა და სამაშველო ჯგუფი გაიგზავნა. ეგვიპტის ჯანდაცვის სამინისტროს განცხადებით, დაშავებულებს შორის ძვლების მოტეხილობები და თავის ტრავმებია, ხოლო ადგილობრივი საავადმყოფოები მომატებული მზადყოფნის რეჟიმზე გადავიდნენ. პროკურატურამ გააფრთხილა, რომ დაღუპულთა რიცხვი შესაძლოა გაიზარდოს.

ქვეყნის პრეზიდენტმა აბდელ ფატახ ალ-სისიმ სოციალურ ქსელში გავრცელებულ განცხადებაში აღნიშნა, რომ სახელმწიფო უწყებებს მომხდარის გამოძიება და პასუხისმგებელი პირების დასჯა დაავალა. პარალელურად, ადგილობრივი მედიის ცნობით, ქვეყანაში ტრანსპორტის მინისტრის გადადგომის მოთხოვნები გაჩნდა.

აღსანიშნავია, რომ უბედური შემთხვევა მოხდა იმავე რეგიონში, სადაც ეგვიპტის ისტორიაში ყველაზე მსხვერპლიანი სარკინიგზო კატასტროფა მოხდა 2002 წელს, როდესაც მატარებელში გაჩენილმა ხანძარმა 370-ზე მეტი ადამიანის სიცოცხლე იმსხვერპლა.