ღაზას სექტორში ძლიერი წვიმისა და ქარის შედეგად გამოწვეულმა წყალდიდობამ ათასობით დევნილი პალესტინელის კარვები და თავშესაფრები დააზიანა. ხელისუფლების განცხადებით, სტიქიამ ზიანი მიაყენა ათასობით ადამიანის საცხოვრებელს, რომლებმაც მძიმე ამინდისგან თავის დაცვა ვერ შეძლეს.

Al Jazeera-ს ცნობით, ახალმა ქარიშხალმა გამოავლინა, თუ რამდენად მყიფეა ის თავშესაფრები, რომელთა გამაგრებასაც ოჯახები დღეების განმავლობაში ცდილობდნენ. სტიქიის ზონაში დატბორილია ლეიბები და ტანსაცმელი. დაახლოებით 400,000 დევნილი ისეთ ადგილებში აფარებს თავს, რომლებიც წყალდიდობის მიმართ განსაკუთრებით დაუცველია.

ღაზას მთავრობის მედიაოფისის ინფორმაციით, გვიანი პარასკევიდან დაწყებულმა ძლიერმა წვიმამ 70,000 კარავი დატბორა და ათობით კედელი დაანგრია. სამოქალაქო თავდაცვის უწყებამ სულ მცირე 1,500 საგანგებო ზარი მიიღო და აღნიშნა, რომ 2,000-ზე მეტი შენობა ჩამონგრევის პირსაა, ხოლო დევნილებისთვის სათანადო თავშესაფრის შესაქმნელად სულ მცირე 300,000 კარავია საჭირო. მთავრობის მედიაოფისის შეფასებით, სტიქიის ზარალმა 3 მილიონი აშშ დოლარი შეადგინა.

Save the Children International-ის ახლო აღმოსავლეთის, ჩრდილოეთ აფრიკისა და აღმოსავლეთ ევროპის რეგიონულმა დირექტორმა, აჰმად ალჰენდავიმ განაცხადა, რომ სიტუაცია მოსალოდნელი იყო და კარვები, საწვავი და თავშესაფრის ნაკრებები საზღვრებთანაა გაჩერებული, რადგან ისრაელის ხელისუფლება მათ შემოტანას ბლოკავს. თავის მხრივ, გაეროს საბავშვო ფონდის (UNICEF) წარმომადგენელმა პალესტინაში, ჯონათან ვეიჩმა აღნიშნა, რომ მოსახლეობის უმრავლესობა მძიმე პირობებში ცხოვრობს და დახმარებისთვის მეტი ფინანსური რესურსის მობილიზება მოითხოვა.