ჰუსიტების განცხადებით, საუდის არაბეთის ავიაიერიშებს იემენში 33 ადამიანი ემსხვერპლა
იემენის სანას პროვინციაში საუდის არაბეთის იერიშების შედეგად 33 ადამიანი, მათ შორის ქალები და ბავშვები დაიღუპნენ, - ამის შესახებ ჰუსიტების ხელისუფლება აცხადებს.
ჰუსიტების ხელისუფლების ცნობით, საუდის არაბეთის ხელმძღვანელობით მოქმედი კოალიციის იერიშებს იემენში, სანას პროვინციაში, 33 ადამიანის სიცოცხლე ემსხვერპლა. ჰუსიტების ჯანდაცვის სამინისტროს წარმომადგენლის, ანის ალასბამის განცხადებით, თავდასხმა სანას აღმოსავლეთით მდებარე სოფელ ალ-შარიაჰზე განხორციელდა. დაღუპულთა შორის არიან ქალები და ბავშვები, ათობით ადამიანი კი დაშავდა.
გაეროს მონაცემებით, იემენში საბრძოლო მოქმედებების განახლების შემდეგ 1 600-ზე მეტი ადამიანი დაიღუპა, ხოლო 300 000-ზე მეტი იძულებით გადაადგილებულ პირად იქცა. საუდის არაბეთი, რომელიც ქვეყანაში საერთაშორისოდ აღიარებულ მთავრობას უჭერს მხარს, მომხდართან დაკავშირებით კომენტარს არ აკეთებს.
მანამდე, საუდის არაბეთის ხელმძღვანელობით მოქმედმა კოალიციამ განაცხადა, რომ რიადის პროვინციის მიმართულებით გაშვებული ჰუსიტური რაკეტა ჩამოაგდეს. თავის მხრივ, ჰუსიტებმა განაცხადეს, რომ სარაკეტო და დრონებით იერიშები მიიტანეს საუდის არაბეთის სამხედრო პოზიციებზე, აეროპორტებსა და ნავთობობიექტებზე.