ახალი ზელანდიის პრემიერ-მინისტრმა კრისტოფერ ლაქსონმა 8 ნოემბერს განაცხადა, რომ მის მემარჯვენე კოალიციას ქვეყნის მომავალი მთავრობის ფორმირების მანდატი აქვს, თუმცა იქვე აღიარა, რომ შედეგები ჯერ კიდევ ბოლომდე გარკვეული არ არის.

წინასწარი მონაცემებით, ლაქსონის ეროვნულმა პარტიამ ყველაზე მეტი მანდატი მოიპოვა. კოალიციურ პარტნიორებთან — პოპულარულ „NZ First“-სა და ლიბერტარიანულ „ACT“-თან ერთად, მათ შესაძლოა სულ მცირე, ორი ხმის უმრავლესობა ჰქონდეთ. საარჩევნო კომისიის ცნობით, წინასწარი დათვლით, ეროვნული პარტია 42 ადგილს ფლობს, ხოლო ოპოზიციური ლეიბორისტული პარტია — 36-ს. მწვანეთა პარტიას 16 ადგილი აქვს, „ACT“-ს 13, „NZ First“-ს 12, ხოლო „Te Pati Maori“-ს ხუთი ადგილი ერგო. გარდა ამისა, შედეგების მიხედვით, ცენტრისტულმა „Opportunity“-ის პარტიამ შვიდი ადგილი მოიპოვა.

კრისტოფერ ლაქსონის განცხადებით, მიუხედავად იმისა, რომ „Opportunity“-ის პარტიის დახმარება მთავრობის შესაქმნელად ნაკლებად სავარაუდოა, ის მზადაა მათ ლიდერთან თანამშრომლობისთვის საკითხებზე, რომლებზეც პოზიციები ემთხვევა.

ოპოზიციური ლეიბორისტული პარტიის ლიდერმა კრის ჰიპკინსმა აღნიშნა, რომ ქვეყანამ აზრი გამოთქვა, თუმცა საბოლოო შედეგების გასაგებად გარკვეული დრო იქნება საჭირო. ლეიბორისტების მემარცხენე ბლოკში ასევე შედის მწვანეთა პარტია და მკვიდრი მოსახლეობის ინტერესების დამცველი „Te Pati Maori“.

ლაქსონი გარდამავალ მთავრობას 27 ნოემბრამდე, საბოლოო ხმების ოფიციალურ გამოცხადებამდე უხელმძღვანელებს. საბოლოო შედეგებში თითქმის 400 000 ე.წ. „სპეციალური ხმა“ შევა, მათ შორის საზღვარგარეთ და ადგილობრივ საარჩევნო უბნებს გარეთ მიცემული ხმები. ისტორიულად, ასეთი ხმები ხშირად მემარცხენეებს უჭერს მხარს, რამაც შესაძლოა მანდატების განაწილებაზე გავლენა იქონიოს.