კოლუმბიის ჩრდილოეთით მდებარე სამხედრო ბაზაზე განხორციელებული დრონით თავდასხმის შედეგად სამი ჯარისკაცი დაიღუპა და სულ მცირე 16 პირი დაიჭრა. ქვეყნის შეიარაღებული ძალების ცნობით, ინციდენტი სანტა-როსა-დელ-სურში, სან-ლუკასის მთისძირში მდებარე პატარა ქალაქში მოხდა. თავდასხმაზე პასუხისმგებლობა ოფიციალურ პირებს ჯერ არ დაუსახელებიათ.

Al Jazeera-ს ცნობით, ეს რეგიონი მდიდარია ოქროს საბადოებით და იქ გავლენისთვის შეიარაღებული დაჯგუფებები, მათ შორის „ყურეს კლანი“, „ეროვნული განმათავისუფლებელი არმია“ (ELN) და FARC-ის ყოფილი წევრების მიერ შექმნილი ჯგუფები იბრძვიან. სოციალურ ქსელში გავრცელებულ კადრებში ჩანს აფეთქების შედეგად წარმოქმნილი კვამლი და სამხედროები, რომლებიც თავშესაფრებს აფარებენ თავს.

კოლუმბიის პრეზიდენტმა აბელარდო დე ლა ესპრიელამ სოციალურ ქსელ X-ში დაწერა, რომ თავდასხმის უკან მდგომთ „დასამალი ადგილი არ ექნებათ“. ქვეყნის ლიდერის განცხადებით, ჯარისკაცებზე თავდასხმა ქვეყნის დაცვის მზაობას კიდევ უფრო აძლიერებს.

როგორც Al Jazeera აღნიშნავს, აგვისტოში პრეზიდენტად მოსვლის შემდეგ ძალადობა ქვეყნის რეგიონებში გაძლიერდა. კონსერვატორმა პრეზიდენტმა გააუქმა მშვიდობიანი მოლაპარაკებები რევოლუციურ ჯგუფებთან და უფრო მკაცრი მიდგომა აირჩია, რაც საჰაერო დარტყმების გაზრდასა და დამატებითი ძალების მობილიზებას გულისხმობს. მთავრობის მტკიცებით, შეიარაღებული დაჯგუფებები წინა ხელისუფლების დროს მიღწეულ ცეცხლის შეწყვეტას პოზიციების განსამტკიცებლად იყენებდნენ, რასაც საპასუხო თავდასხმები მოჰყვა.