ჰორმუზის სრუტეში ორი ნავთობტანკერი ნაღმებზე აფეთქებისა და დაწვის შედეგად ხანძარში გაეხვა. აღნიშნულის შესახებ ირანის ისლამური რევოლუციის გვარდიის კორპუსმა 8 ნოემბერს განაცხადა, რასაც სახელმწიფო საინფორმაციო სააგენტო IRNA ავრცელებს. გვარდიის განცხადებით, ორივე ტანკერი არასანქცირებული მარშრუტით გადაადგილებას ცდილობდა და მრავალი დარღვევა ჰქონდა ჩადენილი, მათ შორის ნავიგაციისა და პოზიციონირების სისტემები გამორთული ჰქონდათ. ერთ-ერთი გემი ჰორმუზის სრუტის აღმოსავლეთ ნაწილში, ხოლო მეორე თავად სრუტეში იმყოფებოდა. უწყებას ტანკერების სახელები და ეროვნება არ დაუკონკრეტებია.

სახელმწიფო სააგენტო IRNA-ს ცნობით, ინციდენტამდე ცოტა ხნით ადრე, ირანის ზოგიერთ ნაწილში, კერძოდ ქეშმში, სირიკში, ჯასკსა და ბანდარ-აბასში აფეთქებების მსგავსი ხმები ისმოდა. ოფიციალურმა პირებმა პორტ ქალაქ ჯასკში „შეტევის“ ფაქტი დაადასტურეს, ხოლო სახელმწიფო ტელევიზიის ინფორმაციით, აფეთქებები შესაძლოა სრუტეში გემების მიმართ გაფრთხილების მიზნით გასროლილ ჭურვებს გამოეწვია.

აღსანიშნავია, რომ თეირანმა თებერვლის ბოლოს ირანის ომის დაწყების შემდეგ სტრატეგიულ წყალზე მოძრაობა მკაცრად შეზღუდა და გემებისგან მის მიერ ავტორიზებული მარშრუტების გამოყენებას ითხოვს. საპასუხოდ, აშშ-მა ირანულ პორტებზე საზღვაო ბლოკადა დააწესა და ტანკერებს სრუტის გადაკვეთაში დაეხმარა.