პოლონეთის ქალაქ კრაკოვის მთავარ მოედანზე მომხდარი შეიარაღებული თავდასხმის შედეგად ოთხი ქალი და ორი მამაკაცი დაიღუპა. Netgazeti-ს ცნობით, თავდამსხმელი მანქანიდან უმისამართოდ ისროდა, რის შემდეგაც პოლიციამ მას ესროლა და დააკავა.

შემთხვევის შედეგად სულ მცირე 15 ადამიანი დაშავდა, მათ შორის ორი პოლიციელი, რომლებიც ეჭვმიტანილთან ორმხრივი სროლისას დაშავდნენ. პოლიციის განცხადებით, ერთ-ერთი დაშავებული პოლიციელის მდგომარეობა მძიმეა. სამართალდამცავთა ცნობით, დაკავებული 24 წლის პოლონეთის მოქალაქეა, რომელსაც ცეცხლსასროლი იარაღის ტარების ლიცენზია ჰქონდა და თავდასხმისას AR-15 ტიპის შაშხანა გამოიყენა. ადგილობრივი პოლიციის წარმომადგენლის თქმით, ეჭვმიტანილს სამხედრო სტილის ტანსაცმელი ეცვა, მის მანქანაში კი დიდი რაოდენობით იარაღი და საბრძოლო მასალა აღმოჩნდა.

პოლიციამ შეტყობინებები დაახლოებით 15:00 საათიდან მიიღო. „როიტერსის“ ინფორმაციით, სოციალურ მედიაში გავრცელებულ კადრებში ჩანდა სისხლიან ქვაფენილზე მწოლიარე ადამიანები და ხალხი, რომლებიც შემთხვევის ადგილიდან გარბოდნენ. თვითმხილველებმა მედიასთან განაცხადეს, რომ მუქი ფერის მანქანიდან ადამიანთა ჯგუფს მოულოდნელად ესროლეს.

მომხდარ ტრაგედიას გამოეხმაურნენ უცხო ქვეყნის ლიდერები და საერთაშორისო ორგანიზაციების წარმომადგენლები. პორტუგალიის საგარეო საქმეთა სამინისტროს ცნობით, დაშავებულებს შორის პორტუგალიელი ქალიცაა. სროლას „შოკისმომგვრელი“ უწოდა უკრაინის პრეზიდენტმა ვოლოდიმირ ზელენსკიმ, ხოლო ევროპის საგარეო პოლიტიკის ხელმძღვანელმა კაია კალასმა მომხდარს „ტრაგედია“ უწოდა.