უკრაინის ქალაქი ზაპორიჟიე და მისი მიმდებარე რეგიონი რუსეთის მხრიდან მუდმივი და ინტენსიური თავდასხმების სამიზნე ხდება. Al Jazeera-ს ცნობით, რეგიონის სამხრეთით მდებარე სოფლებიდან მოსახლეობა მასობრივად ტოვებს სახლებს. ერთ-ერთმა ადგილობრივმა მცხოვრებმა, ვოლოდიმირმა განაცხადა, რომ სოფელ პრეობრაჟენკადან მას შემდეგ გამოიქცა, რაც სარდაფში ყოფნისას დრონებით შეუტიეს. მისი თქმით, ის თავდასხმის შედეგად მძიმედ დაშავდა.

გამოცემის ცნობით, 2 ნოემბერს უკრაინაში მიმდინარე წლის ერთ-ერთი ყველაზე სისხლიანი თავდასხმა მოხდა ქალაქ კომიშუვახაში, სადაც რუსულმა ცხრამ გლაიდ-ბომბმა სულ მცირე 50 ადამიანის სიცოცხლე იმსხვერპლა. თავდასხმის დროს მოქალაქეები ადგილობრივ სკოლაში ჰუმანიტარული დახმარების მისაღებად იყვნენ შეკრებილები. რეგიონული სამხედრო ადმინისტრაციის წარმომადგენლის, დენის კნიშის განცხადებით, ხელისუფლება ემზადება თავშესაფრის გადასატანად, თუ სიტუაცია კიდევ უფრო გაუარესდება.

ზაპორიჟიის ადმინისტრაცია ცდილობს მოქალაქეების დაცვას და ქუჩებში, ასევე სამოქალაქო ინფრასტრუქტურაზე დრონების საწინააღმდეგო ბადეებს ათავსებს. მიუხედავად იმისა, რომ ქალაქში ჯერ კიდევ შეინიშნება ნორმალური ცხოვრების ნიშნები, ადგილობრივები მუდმივ საფრთხეზე საუბრობენ. დასახლებულ პუნქტებში ხშირად ისმის რუსული დრონების ზუზუნი, ხოლო თავდასხმების შედეგად დაზიანებულია ინფრასტრუქტურა და ხიდები. ომის დაწყებიდან მოყოლებული, ზაპორიჟიე ათასობით იძულებით გადაადგილებული პირის თავშესაფარი გახდა, თუმცა ახლა უსაფრთხოების მდგომარეობის გაუარესების გამო, ბევრი მათგანი კვლავ წასვლაზე ფიქრობს.