აშშ-მა ირანის წინააღმდეგ სამუშაო ჯგუფი „Iron Gate“ შექმნა
აშშ-ის ცენტრალური სარდლობის (CENTCOM) შემადგენლობაში ირანის მიერ სახმელეთო გზებით იარაღისა და სხვა მასალების ტრანსპორტირების აღკვეთის მიზნით „Iron Gate“ (რკინის კარიბჭე) სახელწოდების სამუშაო ჯგუფი შეიქმნა.
Habertürk-ის ინფორმაციით, აშშ-ის ცენტრალური სარდლობის (CENTCOM) სარდლის, ადმირალ ბრედ კუპერის სოციალურ ქსელ X-ში გავრცელებული განცხადების თანახმად, ირანის წინააღმდეგ ახალი სამუშაო ჯგუფი, სახელწოდებით „Iron Gate“ (რკინის კარიბჭე), შეიქმნა. აშშ-ის ფლორიდის შტატის ქალაქ ტამპაში დისლოცირებული ახალი სამუშაო ჯგუფი მხარს დაუჭერს აშშ-ის მთავრობის ძალისხმევას, რათა შეზღუდოს ირანის მიერ სახმელეთო გზებით იარაღისა და სხვა მასალების ტრანსპორტირება. გავრცელებული ცნობით, ეს სამუშაო ჯგუფი ითანამშრომლებს აშშ-ის სამთავრობო უწყებებთან იმისათვის, რომ თავიდან აიცილოს „განვითარებული იარაღის სისტემების, ორმაგი დანიშნულების ტექნოლოგიების, სანქციებს დაქვემდებარებული მასალებისა და არალეგალური შემოსავლის წყაროების გადატანა ირანის სახმელეთო საზღვრებისა და კასპიის ზღვის გავლით“.