იემენის დედაქალაქ სანასთან ახლოს მდებარე სოფელ ალ-შარიაში შაბათს განხორციელებული საჰაერო დარტყმების შედეგად, ჰუსიტების კონტროლქვეშ არსებული ჯანდაცვის სამინისტროს მონაცემებით, სულ მცირე 22 ადამიანი დაიღუპა. სამინისტროს ცნობით, დაშავდა კიდევ 30-ზე მეტი ადამიანი.

Deutsche Welle-ს ინფორმაციით, ჰუსიტების მიერ კონტროლებული სამინისტროს სპიკერმა, ანის ალასბაჰიმ სოციალურ ქსელ X-ში განაცხადა, რომ საჰაერო დარტყმები საუდის არაბეთმა განახორციელა და სოფელში რამდენიმე საცხოვრებელი სახლი დაიბომბა. ჰუსიტებთან დაკავშირებულმა მაუწყებელმა „ალ-მასირამ“ გაავრცელა კადრები, სადაც ნანგრევები და საავადმყოფოში მყოფი დაჭრილები ჩანან.

საუდის არაბეთის მხრიდან მომხდარ თავდასხმასთან დაკავშირებით პირველადი კომენტარი არ გაკეთებულა.

ირანის მხარდაჭერილმა ჰუსიტებმა სანა და იემენის დასავლეთ და ჩრდილოეთ ნაწილები 2014 წელს, სამოქალაქო ომის დაწყების შემდეგ დაიკავეს, ხოლო საუდის არაბეთი ადენში განთავსებულ, საერთაშორისო აღიარების მქონე იემენის მთავრობას უჭერს მხარს. გავრცელებული ცნობებით, საუდის არაბეთის ხელმძღვანელობით მოქმედმა კოალიციურმა ძალებმა ასევე განაცხადეს, რომ მათ საუდის არაბეთის რიადის პროვინციის მიმართულებით გაშვებული ჰუსიტების რაკეტა მოიგერიეს.