Deutsche Welle-სა და Al Jazeera-ს ცნობით, შაბათს ღამით რუსეთმა კიევზე და მიმდებარე ტერიტორიებზე მასირებული საჰაერო დარტყმები განახორციელა. რუსეთის თავდაცვის სამინისტროს მტკიცებით, დარტყმების სამიზნე ჩრდილოეთის ხიდი და მერიდიანის ქარხანა იყო. მოსკოვი აცხადებს, რომ ხიდს უკრაინული მხარე შეიარაღებისა და სამხედრო ტექნიკის გადასატანად იყენებდა, ხოლო ქარხანაში „ფლამინგოს“ ტიპის ფრთოსანი რაკეტები იწარმოება.

უკრაინული მხარის ცნობით, ღამის თავდასხმის შედეგად ერთი ადამიანი დაიღუპა, რვა კი დაშავდა. კიევის მერმა ვიტალი კლიჩკომ დაადასტურა ჩრდილოეთის ხიდზე იერიშის მიტანა და აღნიშნა, რომ დედაქალაქი ელექტროენერგიის, გათბობისა და წყალმომარაგების კუთხით „ექსტრემალურად რთულ“ ვითარებაში აღმოჩნდა. კიევის რეგიონის გუბერნატორის განცხადებით, რეგიონის სამ რაიონში ენერგეტიკული ობიექტები დაზიანდა.

უკრაინის პრეზიდენტმა ვოლოდიმირ ზელენსკიმ სოციალურ ქსელში გავრცელებულ განცხადებაში აღნიშნა, რომ რუსეთმა თავდასხმისას 172 დრონი და 36 ბალისტიკური რაკეტა გამოიყენა. მისი თქმით, მოსკოვი ცდილობს კიევი და მთელი ქვეყანა „ბნელეთში ჩაყაროს“.

აღნიშნული იერიშები არაბთა გაერთიანებულ საამიროებში, ქალაქ აბუ-დაბიში, კიევს, მოსკოვსა და ვაშინგტონს შორის დაგეგმილ მეოთხე რაუნდის სამმხრივ მოლაპარაკებამდე რამდენიმე დღით ადრე განხორციელდა. აშშ-ის შუამავლობით გამართულ წინა რაუნდებს რაიმე გარდამტეხი შედეგი არ მოჰყოლია, რადგან ტერიტორიული და უსაფრთხოების საკითხები მთავარ სადავო წერტილებად რჩება.