აშშ-ის პრეზიდენტმა დონალდ ტრამპმა ფლორიდაში ჟურნალისტებთან საუბრისას დაადასტურა, რომ ამერიკელმა სამხედროებმა ირანის ტერიტორიაზე საჰაერო თავდაცვის სისტემების წინააღმდეგ იერიშები განახორციელეს. Trend-ისა და Al Jazeera-ს ცნობით, ტრამპმა აღნიშნულ ქმედებებს „მცირე დარტყმები“ უწოდა.

ტრამპის განცხადებით, ირანმა საჰაერო თავდაცვის გარკვეული სისტემები განათავსა, თუმცა ამერიკულმა ძალებმა მათი განადგურება მოკლე დროში, დაახლოებით 5-დან 15 წუთში შეძლეს. აშშ-ის პრეზიდენტს ზუსტად არ დაუკონკრეტებია, თუ როდის განხორციელდა ეს იერიშები.

მანამდე ირანულმა სახელმწიფო მედიამ ქეშმის კუნძულის სუზას რაიონში ორი სარაკეტო დარტყმის შესახებ იტყობინა. სახელმწიფო მაუწყებელ IRIB-ის ცნობით, ირანის არმიამ ასევე განაცხადა, რომ ქვეყნის საჰაერო თავდაცვის ძალებმა ქეშმის კუნძულის თავზე ამერიკული MQ-9 ტიპის უპილოტო საფრენი აპარატი ჩამოაგდეს.

მოვლენებთან დაკავშირებით აშშ-ის ცენტრალურმა სარდლობამ (CENTCOM) განაცხადა, რომ ვითარება „შედარებით მშვიდია“. გარდა ამისა, CENTCOM-მა სოციალურ ქსელ X-ში გავრცელებულ განცხადებაში აღნიშნა, რომ აშშ 20 მილიონამდე დოლარის ოდენობის ჯილდოს და გადაადგილების შესაძლებლობას სთავაზობს მათ, ვინც ინფორმაციას მიაწვდის ირანის ბირთვული პროგრამის, მისი ობიექტების, აღჭურვილობისა და დაკავშირებული პერსონალის შესახებ.

იერიშების ფონზე, დონალდ ტრამპმა აღნიშნა, რომ მისი ადმინისტრაცია თეირანის წარმომადგენლებთან მოლაპარაკებებს აწარმოებს და ირანთან მიმართებით „მნიშვნელოვანი პროგრესია“ მიღწეული.