პარაგვაის სენატმა პრეზიდენტი სანტიაგო პენია თანამდებობიდან იმპიჩმენტით გადააყენა. აღნიშნულს წინ უძღოდა ქვეყნის ერთ-ერთი უმსხვილესი ციფრული მსესხებლის, Ueno-ს ბანკის მოულოდნელი კოლაფსი, რამაც მილიონობით მომხმარებელს ანგარიშებზე წვდომა შეუზღუდა. Deutsche Welle-სა და Al Jazeera-ს ცნობით, ბანკში მილიონობით საჯარო და საპენსიო სახსრებიც იყო განთავსებული.

მიუხედავად იმისა, რომ პენია გადადგომას ცდილობდა, სენატმა იგი იმპიჩმენტის წესით გაასამართლა და თანამდებობიდან გადააყენა, რითაც მას ყოფილი პრეზიდენტებისთვის მინიჭებული სამუდამო სენატორული მანდატი და იმუნიტეტი მოუხსნა. სენატის კენჭისყრის შემდეგ პროკურატურამ პენიასა და ცენტრალური ბანკის ყოფილ ხელმძღვანელ კარლოს კარვალოსთან დაკავშირებით დაპატიმრების ორდერები გასცა. ოფიციალური პირების განცხადებით, პენია შინაპატიმრობაში იმყოფება.

კრიზისი მას შემდეგ დაიწყო, რაც ქვეყნის ცენტრალურმა ბანკმა განაცხადა, რომ Ueno-ს ბანკის სოლვენტურობის კოეფიციენტმა მინიმალურ ზღვარს ქვემოთ იკლო. ბანკის ანგარიშების გაყინვამ მილიონობით მომხმარებელი, მათ შორის საპენსიო ფონდების ბენეფიციარები, დააზარალა. სოციალური უზრუნველყოფის ინსტიტუტმა (IPS), რომელიც პარაგვაელი მუშაკების პენსიებსა და ჯანდაცვის ფონდებს განკარგავს, ბანკში 355 მილიონი დოლარი ჰქონდა ინვესტირებული.

პენის წინააღმდეგ წარდგენილი ბრალდებები ინტერესთა კონფლიქტს, პენსიების არასწორ მართვას და ბანკთან დაკავშირებულ ინსტიტუციურ დაფარვას მოიცავდა. თავად პენია აცხადებდა, რომ Ueno Holding-ის აქციები 2025 წლის აპრილში გაყიდა.

პენიას გადაყენებისთანავე, პარაგვაის ახალ პრეზიდენტად ვიცე-პრეზიდენტი პედრო ალიანა ფიცით შეუდგა მოვალეობის შესრულებას. იგი 2028 წლის აგვისტომდე, მოქმედი საპრეზიდენტო ვადის ამოწურვამდე იხელმძღვანელებს.