ირანის უმაღლესი ლიდერის უფროსმა მრჩეველმა ალი აქბარ ველიათიმ სომხეთის პრემიერ-მინისტრი ნიკოლ ფაშინიანი ქვეყნის დასავლეთისკენ ორიენტაციისა და აზერბაიჯანისთვის აშშ-ის მიერ მართული სატრანზიტო დერეფნის გახნის გეგმის გამო გააკრიტიკა. „აზატუტიუნის“ ცნობით, ხუთშაბათს გამოქვეყნებულ სტატიაში ველიათიმ განაცხადა, რომ ფაშინიანის პროდასავლური საგარეო პოლიტიკა სომეხი ხალხის ინტერესებს ეწინააღმდეგება.

ველიათიმ ყურადღება გაამახვილა აშშ-სა და სომხეთს შორის გაფორმებულ შეთანხმებაზე, რომელიც ეხება საერთაშორისო მშვიდობისა და კეთილდღეობის „ტრამპის მარშრუტს“ (TRIPP). მისი თქმით, ეს პროექტი ექვივალენტურია ბაქოს მიერ მოთხოვნილი და თეირანის მიერ უარყოფილი ექსტერიტორიული „ზანგეზურის დერეფნისა“. ირანელმა ოფიციალურმა პირმა აღნიშნა, რომ პროექტის განხორციელება ისლამური რესპუბლიკისთვის „წითელ ხაზს“ წარმოადგენს.

გამოცემის თანახმად, სომხეთის პარლამენტმა გასულ კვირას მოახდინა TRIPP-ის პრაქტიკული ასპექტების შესახებ აშშ-სომხეთის ჩარჩო-შეთანხმების რატიფიცირება. შეთანხმება ითვალისწინებს ერთობლივი საწარმოს შექმნას, რომელიც არანაკლებ 49 წლის ვადით ააშენებს და მართავს რკინიგზას, გზას, ენერგომომარაგების ხაზებსა და სხვა ინფრასტრუქტურას, რომელიც აზერბაიჯანს ნახიჩევანის ექსკლავთან და თურქეთთან აკავშირებს. პროექტის განმახორციელებელი კომპანიის (TDC) 74 პროცენტს აშშ-ის მთავრობა ფლობს.

აღსანიშნავია, რომ ველიათის ეს განცხადებები ეწინააღმდეგება ირანის მთავრობის სხვა ოფიციალური პირების, კერძოდ, საგარეო საქმეთა მინისტრ აბას არაღჩის უფრო ადრინდელ განცხადებებს. ოქტომბერში ერევანში ვიზიტისას არაღჩიმ განაცხადა, რომ თეირანი ენდობა სომეხ ძმებს და დარწმუნებულია, რომ ისინი არაფერს აკეთებენ, რაც ირანის უსაფრთხოებას შეელახება.