გერმანიის მთავრობა ფრანგულ-გერმანული თავდაცვითი მწარმოებლის KNDS-ის 50%-იან წილს დაახლოებით 6,5 მილიარდ ევროდ შეიძენს. როგორც Interfax-ი Bloomberg-ის წყაროებზე დაყრდნობით წერს, სამხედრო ტექნიკის მწარმოებლის აქციების მფლობელმა ვეგმანების ოჯახმა თავისი წილის გერმანიის მთავრობისთვის მიყიდვაზე თანხმობა განაცხადა. შედეგად, გერმანიისა და საფრანგეთის ხელისუფლებები KNDS-ის თანაბარუფლებიანი მესაკუთრეები გახდებიან.

გარიგების დასრულება შესაძლოა მიმდინარე წელსვე შედგეს, რის გამოც კომპანიის პირველადი საჯარო შეთავაზების (IPO) გეგმები განუსაზღვრელი ვადით გადაიდება. გავრცელებული ინფორმაციით, ადრე იგეგმებოდა, რომ KNDS ბაზარზე თავისი აქციების 20%-ს განთავსებდა, ხოლო გერმანია ვეგმანებისგან აქციების 40%-ს იყიდდა. Bloomberg-ის ცნობით, გერმანიის მთავრობამ კომპანიის ღირებულების შეფასება შეამცირა – ივნისში ის მზად იყო კომპანიის 40%-ში დაახლოებით 7,2 მილიარდი ევრო გადაეხადა.

KNDS, რომელიც გერმანული Krauss-Maffei Wegmann-ისა და ფრანგული Nexter-ის შერწყმით 2015 წელს შეიქმნა, ევროპაში ერთ-ერთი უმსხვილესი არასაჯარო სამხედრო-სამრეწველო კომპანიაა. ის აწარმოებს Leopard-ისა და Leclerc-ის ტიპის ტანკებს, თვითმავალ საარტილერიო დანადგარებს, ასევე ფლობს საბრძოლო მასალების წარმოების განყოფილებას. წყაროების თანახმად, კომპანიის 2025 წლის შემოსავალმა 4,4 მილიარდი ევრო შეადგინა, დეკემბრის ბოლოსთვის შეკვეთების მოცულობამ 33,1 მილიარდი ევრო შეადგინა, ხოლო თანამშრომელთა რაოდენობამ დაახლოებით 11 ათასი კაცი შეადგინა.