რუსეთმა ირანს 90 მოწინავე სარაკეტო დანადგარი მიაწოდა, იტყობინება Financial Times-ი რუსული თავდაცვის საწარმოს დოკუმენტებზე დაყრდნობით. გამოცემის ცნობით, შეთანხმება 2024 წელს გაფორმდა, თუმცა Al Jazeera-მ ვერ შეძლო იმის დადასტურება, თუ რამდენად იქნა ეს შეკვეთა რეალურად მიწოდებული.

აღნიშნული დანადგარები განკუთვნილია რუსული მსუბუქი მრავალმიზნობრივი მართვადი რაკეტებისთვის (LMUR ანუ Izdeliye 305) და თავსებადია Mi-28 ტიპის დამრტყმელ ვერტმფრენებთან, რომლებიც ირანს უკვე გააჩნია. გავრცელებული ცნობებით, ეს ფაქტი ხაზს უსვამს მოსკოვსა და თეჰრანს შორის სამხედრო კავშირების გაძლიერებას 2022 წელს უკრაინაში რუსეთის ფართომასშტაბიანი შეჭრის შემდეგ.

აღსანიშნავია, რომ ეს ინფორმაცია გავრცელდა ირანის უმაღლესი უსაფრთხოების საბჭოს მდივნის, მოჰსენ რეზაის მოსკოვში ვიზიტის მეორე დღეს. კრემლის განცხადებით, შეხვედრაზე, სადაც რეზაიმ ვლადიმერ პუტინს ირანის უზენაესი ლიდერის გზავნილი გადასცა, მხარეებმა ორმხრივი თანამშრომლობის ყოვლისმომცველი ხელშეკრულების შემდგომი განვითარება განიხილეს. აღნიშნული სტრატეგიული პარტნიორობის ხელშეკრულება მხარეებმა 2025 წლის იანვარში გააფორმეს, ხოლო ძალაში იმავე წლის ოქტომბერში შევიდა.

პარალელურად, ირანის არმიის სპიკერმა მოჰამად აკრამინიამ განაცხადა, რომ თეჰრანმა რუსული Su-35 ტიპის გამანადგურებლებიც შეიძინა. თავის მხრივ, დასავლური მედიისა და ანალიტიკოსების ცნობით, უკრაინაში მიმდინარე ომის ფონზე, თეჰრანმა მოსკოვს საბრძოლო მასალა, საარტილერიო ჭურვები, ცეცხლსასროლი იარაღი, მოკლე მანძილზე მოქმედი ბალისტიკური რაკეტები და სხვა აღჭურვილობა მიაწოდა.