აზერბაიჯანის სახალხო ფრონტის პარტიის (AXCP) თავმჯდომარე ალი ქარიმლი 2026 წლის საერთაშორისო მაგნიტსკის ადამიანის უფლებათა ჯილდოს მფლობელი გახდა. როგორც ჯილდოს ორგანიზატორების ოფიციალურ ვებგვერდზე გამოცხადდა, ის გამარჯვებულად დასახელდა ნომინაციაში „გამორჩეული ოპოზიციონერი პოლიტიკოსი“.

ორგანიზატორების შეფასებით, ქარიმლი მრავალი წელია იბრძვის აზერბაიჯანში დემოკრატიული რეფორმების გასატარებლად, კორუფციის წინააღმდეგ და სამოქალაქო თავისუფლებების დასაცავად. ორგანიზატორების ცნობითვე, ოპოზიციონერი პოლიტიკოსი 2025 წლის ნოემბერში დააკავეს და მის წინააღმდეგ წაყენებულ ბრალდებებს პოლიტიკურად მოტივირებულად მიიჩნევენ. მათივე ინფორმაციით, ქარიმლი პატიმრობაში არასათანადო მოპყრობას განიცდის, მისი ჯანმრთელობის მდგომარეობა გაუარესებულია და საერთაშორისო უფლებადამცველი ორგანიზაციები მის გათავისუფლებას მოითხოვენ.

წყაროს ცნობით, ალი ქარიმლი 2025 წლის 29 ნოემბერს აზერბაიჯანის სახელმწიფო უსაფრთხოების სამსახურმა დააკავა. მას სისხლის სამართლის კოდექსის 278.1 მუხლით გათვალისწინებულ დანაშაულს ედავებიან, რაც ხელისუფლების ძალადობრივი გზით ხელში ჩაგდებასა და ქვეყნის კონსტიტუციური წყობილების ძალადობრივ შეცვლას გულისხმობს. ქარიმლი ბრალდებებს არ აღიარებს და მის დაკავებას პოლიტიკურ დევნას უკავშირებს.

2026 წლის 3 ნოემბერს ბაქოს მძიმე დანაშაულთა სასამართლოში ქარიმლისა და სახალხო ფრონტის პარტიის პრეზიდიუმის წევრის, მეჰმედ იბრაჰიმის საქმეზე წინასასამართლო სხდომა გაიმართა. სასამართლომ საქმე არსებითად განსახილველად გადასცა, ხოლო მომდევნო სხდომა 13 ნოემბრისთვის დაინიშნა.