ირანული ძალების ინფორმაციით, ჰორმუზის სრუტეში მინიმუმ ხუთი ტანკერი დაზიანდა. ისლამური რევოლუციის გვარდიის კორპუსის (IRGC) ცნობით, გასულ ღამეს სრუტის სამხრეთით მოძრავი დიდი ნავთობტანკერი ნაღმზე აფეთქდა, რის შემდეგაც ხანძარი გაუჩნდა და გაჩერდა. გარდა ამისა, სრუტის აღმოსავლეთით კიდევ ერთი სუპერტანკერი დაზიანდა, ხოლო ბუქსირი, რომელიც ცეცხლის ჩასაქრობად მივიდა, ასევე დაიწვა. ირანის არმიის განცხადებით, მოგვიანებით საზღვაო ნაღმებზე კიდევ სამი ტანკერი აფეთქდა.

პარალელურად, ბრიტანეთის სამხედრო უწყების ცნობით, კატარის სანაპიროებთან მდებარე ტანკერი ორმა ჭურვმა დააზიანა. ინციდენტი ოთხშაბათს მოხდა. გაერთიანებული სამეფოს საზღვაო სავაჭრო ოპერაციების (UKMTO) სააგენტოს ინფორმაციით, თავდასხმაზე პასუხისმგებლობა არავის აუღია. გასულ კვირას კატარული ტანკერი „ალ მაიედა“ უცნობმა საგნებმა დააზიანა, თუმცა ეკიპაჟის წევრები არ დაშავებულან.

აშშ-ის პენტაგონის უსახელო ოფიციალურმა პირებმა და სამხედრო მეთაურებმა New York Times-ს განუცხადეს, რომ აშშ-ის ძალები ახლო აღმოსავლეთსა და რეგიონის ბაზებზე პრეზიდენტ დონალდ ტრამპის ბრძანებით ირანის წინააღმდეგ საბრძოლო ოპერაციების განახლებისთვის ემზადებიან. თავის მხრივ, ირანის ლიდერებმა აშშ-სა და ისრაელს შესაძლო სამხედრო ქმედებების საპასუხოდ გააფრთხილეს.