აშშ-ის პირველმა ლედიმ მელანია ტრამპმა რუსეთისა და უკრაინის წარმომადგენლებს თეთრ სახლში გამართულ შეხვედრაზე მოუწოდა, რომ სარგებლობა მიიღონ ბოლო პერიოდის ლოკალური ცეცხლის შეწყვეტის შედეგებით და უფრო „ხანგრძლივი“ მშვიდობა სთხოვონ. თეთრი სახლის განცხადებით, ეს ისტორიაში პირველი შემთხვევაა, როდესაც პირველმა ლედიმ დაპირისპირებული ქვეყნების წარმომადგენლები დიპლომატიური მიზნით პირადად მიიწვია.

შეხვედრას ესწრებოდნენ რუსეთის პრეზიდენტის სპეციალური წარმომადგენელი კირილ დმიტრიევი, რუსეთის ადამიანის უფლებათა კომისარი იანა ლანტრატოვა, უკრაინის პარლამენტში „ხალხის მსახურის“ ლიდერი დავით არახამია და უკრაინის საპარლამენტო ომბუდსმენი დმიტრო ლუბინეცი. მელანია ტრამპმა მხარეებს მოსთხოვა, რომ უკრაინის ხერსონის ოლქში, ოკუპირებულ ქალაქ ოლეშკიში არსებული ჰუმანიტარული ზავი „ბნელ სამყაროში ნაპერწკლად“ აღიქვან.

ექვსდღიანმა ზავმა, რომელიც ოქტომბრის ბოლოს ამოქმედდა, თითქმის 800 ადამიანის ევაკუაცია და ჰუმანიტარული დახმარების მიწოდება უზრუნველყო. ეს იყო ყველაზე ხანგრძლივი მრავალდღიანი ზავი მოსკოვსა და კიევს შორის 2022 წლის სრულმასშტაბიანი შეჭრის შემდეგ. უკრაინულმა მხარემ მელანია ტრამპს პრეზიდენტ ვოლოდიმირ ზელენსკის მიერ მინიჭებული წმინდა ოლღას პირველი ხარისხის ორდენი გადასცა. პირველმა ლედიმ სტუმრებს ვლადიმერ პუტინისა და ვოლოდიმირ ზელენსკის სახელზე დაწერილი პირადი წერილებიც გადასცა.

მოგვიანებით, აშშ-ის პრეზიდენტმა დონალდ ტრამპმა განაცხადა, რომ კირილ დმიტრიევთან შეხვედრის შემდეგ, რუსეთსა და უკრაინას შორის შეთანხმება შესაძლოა მალე შედგეს. რუსეთსა და უკრაინას შორის ახალი მოლაპარაკებები აბუ-დაბიშია დაგეგმილი.