ლონდონის საუთვორკის სამეფო სასამართლოს ნაფიცმა მსაჯულებმა ბრიტანელი კომიკოსი და მსახიობი რასელ ბრენდი ერთ გაუპატიურებასა და სამ სექსუალურ ძალადობაში დამნაშავედ ცნეს. გავრცელებული ინფორმაციით, ბრენდი კიდევ ორ გაუპატიურებასა და ძალადობის ერთ მცდელობაში გამართლდა. მოსამართლე ჯოელ ბენათანის განცხადებით, მსახიობს „მნიშვნელოვანი“ პატიმრობა ემუქრება, ხოლო განაჩენი ორშაბათისთვისაა ჩანიშნული.

Deutsche Welle-ს ცნობით, პროკურორებმა ბრენდი სექსუალურ მტაცებლად შეაფასეს და ბრალდებები წარადგინეს 1999-დან 2009 წლამდე პერიოდში მომხდარ ფაქტებზე, რა დროშიც ის პატარა სცენებიდან ტელეწამყვანობასა და ჰოლივუდის კინოვარსკვლავობამდე დაწინაურდა. გამოძიებას საფუძვლად დაედო 2023 წლის სექტემბერში The Sunday Times-ისა და Channel 4 Dispatches-ის ჟურნალისტური გამოძიება, რომლის შემდეგაც პოლიციას ქალებმა მიმართეს.

სასამართლო პროცესზე წარმოდგენილი მტკიცებულებების თანახმად, ბრენდი პოპულარობას ბოროტად იყენებდა სექსუალური კავშირის დასამყარებლად და ქალებს ობიექტებად ეპყრობოდა. თავად ბრენდი წარდგენილ ბრალდებებს უარყოფდა და აცხადებდა, რომ მიუხედავად წარსულში არსებული დამოკიდებულებებისა, ის არასდროს ჩართულა არანებაყოფლობით აქტივობებში.