რუსეთის სრულმასშტაბიანი შეჭრის შემდეგ, ამერიკული პროგრამული უზრუნველყოფის კომპანია Palantir-ის თანამშრომლობა უკრაინასთან გააქტიურდა. ალ ჯაზირას ცნობით, უკრაინა თანამედროვე ისტორიაში პირველი ქვეყანა გახდა, რომელიც საბრძოლო მონაცემებს სისტემატურად აგროვებს. ეს ინფორმაცია სამხედრო ხელოვნური ინტელექტის მოსამზადებლად, შაბლონების გამოსაცნობად და პროგნოზების გასაკეთებლად გამოიყენება.

მიუხედავად იმისა, რომ ეს მონაცემები უკრაინას რუსული თავდასხმების მონიტორინგში, პროგნოზირებასა და მათზე რეაგირებაში ეხმარება, ზოგიერთი დამკვირვებელი აღნიშნავს, რომ ის ზრდის ამერიკული კორპორაციის შესაძლებლობებსაც. უკრაინის თავდაცვის სექტორის ზოგიერთმა წარმომადგენელმა კითხვის ნიშნის ქვეშ დააყენა მთავრობის გადაწყვეტილება, ქვეყნის ძვირფასი აქტივი კერძო ტექნოლოგიურ კომპანიას გაუზიაროს.

უკრაინელმა სამხედრომ და ყოფილმა მთავარმა სერჟანტმა ვალერი მარკუსმა ფეისბუქზე დაწერა, რომ უკრაინა სისხლით იხდის იმ მონაცემებისთვის, რომლებსაც სხვები კაპიტალად, საერთაშორისო გავლენად და დიდ ფულად გარდაქმნიან. თავის მხრივ, კომპანია აცხადებს, რომ მომხმარებლები საკუთარ მონაცემებს ფლობენ და აკონტროლებენ, ხოლო Palantir-ი მათ საკუთარი მიზნებისთვის არასდროს იყენებს და ინახავს.

ალ ჯაზირას ცნობით, Palantir-ის ტექნოლოგიები ადრეც იყო დაკავშირებული ადამიანის უფლებების დარღვევებთან და სხვადასხვა ქვეყნის სამთავრობო თუ კერძო სტრუქტურებთან გაფორმებულმა კონტრაქტებმა საზოგადოების ნაწილის უკმაყოფილება გამოიწვია. გარდა ამისა, ექსპერტები კერძო ტექნოლოგიურ კომპანიებზე სახელმწიფოების გაზრდილი დამოკიდებულების რისკებზე მიუთითებენ.