ფინეთის სასამართლომ პატიმრობა მიუსაჯა აზერბაიჯანელ მეზღვაურს და დამნაშავედ ცნო მისი გემის, Fitburg-ის რუსი კაპიტანის დახმარებაში, რომელიც ფინეთის ყურეში ზღვისქვეშა კაბელების დაზიანებაშია ბრალდებული. OC Media-ს ცნობით, ჰელსინკის რაიონულმა სასამართლომ კაპიტანს, ანდრეი მაქსიმენკოს, სამი წლითა და ექვსი თვით თავისუფლების აღკვეთა მიუსაჯა, ხოლო აზერბაიჯანელ ბოცმანს, ვუსალ მაჯიდოვს — ორი წლითა და 10 თვით დამძიმებული სისხლის სამართლის დანაშაულისთვის, რომელიც 2025 წლის ახალი წლის ღამეს მომხდარ ინციდენტს უკავშირდება.

სასამართლოს დადგენილებით, გემმა ღუზა ზღვის ფსკერზე დაახლოებით 130 კილომეტრის მანძილზე ათრია, რამაც ორი სატელეკომუნიკაციო კაბელი დააზიანა, ხოლო რამდენიმე სხვა კაბელი და გაზსადენი საფრთხის ქვეშ დააყენა. ორივე ბრალდებული უარყოფს დანაშაულს და გადაწყვეტილება შესაძლებელია, გასაჩივრდეს.

გამოძიებისა და სასამართლოს მონაცემებით, ინციდენტი 2025 წლის 31 დეკემბრის დილით მოხდა, როდესაც გემი ფინეთის ტერიტორიული წყლების მიღმა ცურავდა. სასამართლომ დაადგინა, რომ მიუხედავად იმისა, რომ პროკურატურას არ წარუდგენია მტკიცებულება იმისა, თითქოს კაპიტანს პირადად უბრძანებია ღუზის ჩამოშვება ან ბოცმანს აქტიურად მიუღია მონაწილეობა მის ჩამოშვებაში, ორივემ იცოდა ღუზის დაშვების შესახებ. სასამართლომ ასევე დააკისრა მათ დაზარალებულთათვის სარემონტო და საგამოძიებო ხარჯების ერთობლივად ანაზღაურება.