სომხეთის წამყვანმა ოპოზიციურმა ჯგუფებმა ეროვნული ალიანსის შექმნის შესახებ განაცხადეს. ისინი მმართველი პარტიის, „სამოქალაქო კონტრაქტის“ გეგმას უპირისპირდებიან, რომელიც კონსტიტუციაში ცვლილებების შეტანას ითვალისწინებს. ოპოზიციამ ამ ინიციატივას „ალიევის კონსტიტუცია“ უწოდა.

განცხადება რუსეთში მოღვაწე სომეხი მილიარდერის, ოპოზიციური მოძრაობა „ძლიერი სომხეთის“ ლიდერის, სამველ კარაპეტიანისა და მისი 35 თანამშრომლის დაკავებიდან რამდენიმე საათში გავრცელდა. კარაპეტიანი და სხვა პირები სომხეთის მთავარი ელექტროქსელის ოპერატორ კომპანიაში — „სომხეთის ელექტროქსელებში“ (ENA) 65 მილიარდ დრამზე მეტი ოდენობის ზარალის საქმეზე მიმდინარე გამოძიების ფარგლებში დააკავეს. სამველ კარაპეტიანის ძმისშვილმა, ნარეკ კარაპეტიანმა ბრალდებები უარყო და განაცხადა, რომ ხელისუფლება მის ბიძას საკონსტიტუციო ცვლილებების მხარდასაჭერად „ვაჭრობის საგნად“ იყენებს.

„ძლიერი სომხეთის“ ინიციატივით, კარაპეტიანის რეზიდენციაში გამართული შეხვედრის მონაწილეებმა ერთობლივი განცხადება გამოაქვეყნეს. ახალი კონსტიტუციის მიღების უარყოფის გარდა, ოპოზიციურმა ჯგუფებმა კიდევ სამი ძირითადი მიზანი დაისახეს: „მშვიდობა ცალმხრივი დათმობებისა და ტერიტორიული დანაკარგების გარეშე“, „ეროვნული იდენტობისა და სომხური სამოციქულო წმინდა ეკლესიის დაცვა“ და „დემოკრატიული თავისუფლებებისა და უფლებების აღდგენა“. ისინი პოლიტიკურ პარტიებსა და საზოგადოებრივ მოღვაწეებს ალიანსისკენ მოუწოდებენ.

თავის მხრივ, პრემიერ-მინისტრმა ნიკოლ ფაშინიანმა აღნიშნულ ოპოზიციურ შეხვედრასთან დაკავშირებით განაცხადა, რომ სამართალდამცავებმა კანონდარღვევებზე რეაგირება უნდა მოახდინონ. მისი თქმით, გასული ათწლეულების განმავლობაში სომხეთში ქონების მითვისება ხშირად ისეთი ცნებების მიღმა იყო დამალული, როგორიცაა აზერბაიჯანი და თურქეთი.