საქართველოს სამი ადგილობრივი საარჩევნო სადამკვირვებლო ორგანიზაციის განცხადებით, საარჩევნო კანონმდებლობაში ინიცირებული ცვლილებები არჩევნების შედეგების სასამართლოში გასაჩივრებას ართულებს, ხმის მიცემის შედეგების გადამოწმების შესაძლებლობებს ამცირებს და საარჩევნო პროცესზე ზედამხედველობას ასუსტებს. „საქართველოს ახალგაზრდა იურისტთა ასოციაციის“, „სამართლიანი არჩევნებისა და დემოკრატიის საერთაშორისო საყრდენისა“ და „საერთაშორისო გამჭვირვალობა - საქართველოს“ შეფასებით, საკანონმდებლო ინიციატივა არსებულ დამცავ მექანიზმებს ასუსტებს და საარჩევნო ადმინისტრაციის ცენტრალიზაციას ზრდის.

როგორც OC Media წერს, კანონპროექტი პარლამენტში 28 ოქტომბერს ექვსმა დეპუტატმა წარადგინა. ინიციატივა საარჩევნო და ადგილობრივი თვითმმართველობის კოდექსებში ცვლილებებს ითვალისწინებს. ორგანიზაციების განცხადებით, საარჩევნო კანონმდებლობის ფუნდამენტური გადასინჯვა ფართო პროფესიული და საზოგადოებრივი კონსენსუსის გარეშე, „ქართული ოცნების“ მიერ დამკვიდრებულ მანკიერ პრაქტიკას წარმოადგენს, რაც ვენეციის კომისიის სტანდარტებს ეწინააღმდეგება.

მთავარ ცვლილებებს შორის არის ცენტრალური საარჩევნო კომისიის (ცესკო) საბოლოო ოქმის გასაჩივრების წესი, რომლის მიხედვითაც, საბოლოო ოქმზე პრეტენზიები მხოლოდ ტექნიკური ან მექანიკური შეცდომების გამოსასწორებლად იქნება დასაშვები. ორგანიზაციები აფრთხილებენ საზოგადოებას, რომ ეს სასამართლოს შეუზღუდავს შესაძლებლობას, განიხილოს საჩივრები ფართო ან სისტემურ დარღვევებთან დაკავშირებით. კანონპროექტი ასევე აუქმებს საარჩევნო უბნების შემთხვევითი შერჩევისა და ხელახალი გადათვლის სავალდებულო მოთხოვნას და ცვლის დამკვირვებელთა რეგისტრაციის უფლებამოსილებას, რომელიც კოლეგიური ორგანოს ნაცვლად, შესაძლოა, კომისიის თავმჯდომარემ ერთპიროვნულად გადაწყვიტოს. აღნიშნული ცვლილებები, სადამკვირვებლო ორგანიზაციების შეფასებით, სوبიექტური ან პოლიტიკურად მოტივირებული გადაწყვეტილებების რისკებს ზრდის.