შეერთებული შტატების შუალედურ არჩევნებში დემოკრატიულმა პარტიამ კონგრესის ორივე პალატაზე კონტროლი მოიპოვა. მიუხედავად ამ გამარჯვებისა, „ალ ჯაზირას“ ცნობით, მთავარი კითხვის ნიშანი რჩება იმაზე, თუ რამდენად შეძლებენ ისინი წინასაარჩევნო დაპირებების შესრულებას, რადგან დემოკრატები კონგრესში ძალაუფლებას მხოლოდ იანვარში აიღებენ ხელში და რესპუბლიკელების თანამშრომლობის გარეშე მათი შესაძლებლობები შეზღუდული იქნება.

დემოკრატებმა წინასაარჩევნოდ ცხოვრების ღირებულების შემცირება, ირანთან ომის დასრულება, პრეზიდენტ დონალდ ტრამპის ანგარიშვალდებულება და მისი საემიგრაციო პოლიტიკის წინააღმდეგ წასვლა დაისახეს მიზნად. თუმცა სენატში კანონპროექტების გასატარებლად ხშირად 60 ხმაა საჭირო, ხოლო ტრამპმა უკვე განაცხადა, რომ ყველაფერს ვეტოს დაადებს.

ექსპერტების შეფასებით, დემოკრატებს საკონტროლო ბერკეტები ექნებათ საპარლამენტო კომიტეტებისა და სენატის მოსმენების მეშვეობით. ეკონომისტ დეინ ბეიკერის თქმით, ხარჯების შესამცირებლად ერთ-ერთი ყველაზე ეფექტური გზა ირანთან ომის დასრულება იქნებოდა, რადგან კონფლიქტმა ენერგომატარებლების ფასები გაზარდა. გარდა ამისა, დემოკრატები გეგმავენ ჯანდაცვის სუბსიდიების აღდგენას და სამთავრობო ხარჯების კანონპროექტებში შესაბამისი ზომების შეტანას.

„ალ ჯაზირას“ ცნობით, დემოკრატები ფართოდ გამოიყენებენ საგამოძიებო უფლებამოსილებებს, რათა შეისწავლონ კომპანიების მიერ ფასების ზრდის მიზეზები და ტრამპის ოჯახის ბიზნესიმპერიისა და პირადი ქონების ზრდის წყაროები. მიუხედავად იმისა, რომ ტრამპის ადმინისტრაციის წარმომადგენლებმა შესაძლოა სასამართლოში გაასაჩივროან უწყებები, დემოკრატებს მაინც ექნებათ შესაძლებლობა, დაკითხონ მთავრობის თანამშრომლები.

საემიგრაციო პოლიტიკის მიმართულებით, ექსპერტები მიიჩნევენ, რომ დემოკრატებმა შესაძლოა სცადონ საიმიგრაციო და საბაჟო აღსრულების სამსახურის (ICE) დაფინანსების შემცირება, თუმცა ამასაც კანონპროექტის მიღება და ტრამპის შესაძლო ვეტოს გადალახვა დასჭირდება.