მიჩიგანის შტატში გამართულ არჩევნებში დემოკრატმა კანდიდატმა აბდულ ელ-საიედმა რესპუბლიკელების კანდიდატი მაიკ როჯერსი დაამარცხა და აშშ-ის სენატის ისტორიაში პირველი მუსლიმი წევრი გახდა. „ალ-ჯაზირას“ ცნობით, საარჩევნო კამპანია მისი რელიგიური ნიშნით კრიტიკისა და თავდასხმების ფონზე მიმდინარეობდა. დონალდ ტრამპმა და ჯეი დი ვენსმა ელ-საიედის წინააღმდეგ სხვადასხვა ეტიკეტი და რასისტული ტორიკა გამოიყენეს.

42 წლის გამარჯვებულმა მხარდამჭერებს სიტყვით მიმართა და აღნიშნა, რომ ოფიციალური თანამდებობის დაკავების შემდეგ მისთვის სენატორის სტატუსით უნდა მიემართათ. ხმების 95%-ზე მეტის დათვლის შედეგად, ელ-საიედი ხმების 52 პროცენტზე მეტს აგროვებს.

არჩევნების ისტორიულ მნიშვნელობაზე საუბრისას, პოლიტიკურმა ანალიტიკოსმა რამი ხურიმ „ალ-ჯაზირას“ განუცხადა, რომ ელ-საიედის გამარჯვებამ შესაძლოა არაბი და მუსლიმი ამერიკელების მიმართ დამოკიდებულება შეცვალოს და ანტიარაბული და ისლამოფობიური განწყობები შეამციროს. თავად ელ-საიედის განცხადებით, მისი ძირითადი ფოკუსი ეკონომიკური უთანასწორობის, ჯანდაცვისა და ქვეყანაში არსებული ცხოვრებისეული ხარჯების წინააღმდეგ ბრძოლაა.

ეგვიპტური წარმომავლობის ექიმი და საზოგადოებრივი ჯანდაცვის სპეციალისტი ელ-საიედი კამპანიის დროს აკრიტიკებდა აშშ-ის საგარეო პოლიტიკასა და ახლო აღმოსავლეთში სამხედრო ჩარევას. მიჩიგანი, რომელიც ტრამპმა ორი წლის წინ მოიგო, მიჩნეულია მნიშვნელოვან შტატად, ხოლო ელ-საიედის გამარჯვება დემოკრატიული პარტიის პროგრესული ძალებისთვის მნიშვნელოვან წინსვლად ფასდება.