ეთიოპიური წარმოშობის ამერიკელმა მოქალაქემ და აშშ-ის ყოფილმა კონტრაქტორმა, აბრაჰამ ტეკლუ ლემამ, დამნაშავედ ცნო თავი საიდუმლო სადაზვერვო ინფორმაციის გადაცემაში. პროკურატურის განცხადებით, მან ათობით კლასიფიცირებული დოკუმენტი და ფოტოგრაფია გაუზიარა ეთიოპიის მაღალჩინოსნებს, იმ იმედით, რომ ეს ინფორმაცია ტიგრაიას რეგიონიდან მებრძოლების წინააღმდეგ ბრძოლაში დაეხმარებოდა.

BBC-ის ცნობით, 54 წლის აბრაჰამი აშშ-ის სახელმწიფო დეპარტამენტში, იუსტიციის სამინისტროსა და ეროვნული სადაზვერვო სამმართველოში კონტრაქტორად მუშაობდა. გამოძიების თანახმად, ის 2021 წლიდან 2023 წლის აგვისტომდე თანამდებობრივ მდგომარეობას იყენებდა და დაცული ობიექტებიდან საიდუმლო მასალებს ხელნაწერი ჩანაწერებისა და ელექტრონული ფაილების სახით გამოიტანდა. ინფორმაციას ის ეთიოპიის ოფიციალურ პირებს დაშიფრული შეტყობინებების მეშვეობით აწვდიდა.

პროკურორების თქმით, გადაცემული მასალა მოიცავდა სატელიტურ სურათებსა და სამხედრო აქტივობების დეტალებს. გამოძიების ცნობით, ეთიოპიის მხარემ მიწოდებული დაზვერვა სამხედრო ოპერაციებში გამოიყენა. საქმის მასალების მიხედვით, 2021 წლის დეკემბერში ბრალდებულმა ერთ-ერთ ეთიოპიელ ოფიციალთან მიწერილ შეტყობინებაში აღნიშნა, რომ აუცილებელი იყო ამ ადამიანების ბოლომდე განადგურება, ხოლო მოგვიანებით დრონების გაგზავნა მოითხოვა.

გარიგების საფუძველზე, აბრაჰამ ლემას 22 წლამდე თავისუფლების აღკვეთა ემუქრება. მისი განაჩენის გამოტანა 2027 წლის 14 აპრილისთვისაა ჩანიშნული. აღნიშნული საქმე ეხება 2020-2022 წლების ორწლიან სამოქალაქო ომს ეთიოპიაში, რომელსაც ასეულობით ათასი ადამიანი ემსხვერპლა, მილიონობით კი იძულებით გადაადგილდა.