სომხეთის საგამოძიებო კომიტეტმა სახელმწიფო კუთვნილ „ENA“ (Electric Networks of Armenia) კომპანიისთვის მიყენებული ზიანის გამო 36 პირის მიმართ სისხლის სამართლის საქმეები აღძრა. ამის შესახებ ინფორმაციას სომხეთის საგამოძიებო კომიტეტის პრესსპიკერი კიმა ავდალიანი ავრცელებს.

აღინიშნება, რომ „სომხეთის ელექტროქსელების“ კომპანიისთვის მიყენებული სავარაუდო ზიანის ოდენობა 64,5 მილიარდ დრამს (დაახლოებით 180 მილიონ აშშ დოლარს) შეადგენს. გამოძიების ფარგლებში კომპანიის სამეთვალყურეო საბჭოს წევრი ვარდან მაკარიანი დააკავეს. ის წარსულში სომხეთის ყოფილი პრეზიდენტის, სერჟ სარგსიანის ადმინისტრაციის ხელმძღვანელის თანამდებობაზე მუშაობდა, ასევე არმენ სარგსიანის პრეზიდენტობის პერიოდში ადმინისტრაციის ხელმძღვანელის მოვალეობას ასრულებდა.

მონაცემების თანახმად, მაკარიანი სამველ და ნარეკ კარაპეტიანების, აგრეთვე მათთან დაკავშირებული პირების სახლებში ჩატარებული ჩხრეკისას დააკავეს. 4 ნოემბერს სომხეთის საგამოძიებო კომიტეტმა განაცხადა, რომ ეკონომიკურ დანაშაულებთან და კონტრაბანდასთან დაკავშირებით გამოძიებული სისხლის სამართლის საქმის ფარგლებში ქვეყნის 65 მისამართზე ერთდროულად ჩხრეკა ჩატარდა. ჩხრეკები, აგრეთვე, „ძლიერი სომხეთის“ ოპოზიციური პარტიის ლიდერის, „Taşir Group“-ის კომპანიების ჯგუფის ხელმძღვანელის, სამველ კარაპეტიანისა და მისი ძმისშვილის, საპარლამენტო ფრაქციის ხელმძღვანელის, ნარეკ კარაპეტიანის სახლებშიც განხორციელდა.