3 ნოემბერს შეერთებულ შტატებში შუალედური არჩევნები იმართება. მიუხედავად იმისა, რომ არჩევნები არ წყვეტს, ვინ იჯდება თეთრ სახლში, ამერიკელები ირჩევენ წარმომადგენლებს კაპიტოლიუმისთვის. შუალედური არჩევნები ტარდება ყოველ ოთხ წელიწადში ერთხელ, საპრეზიდენტო არჩევნებს შორის ზუსტად შუა პერიოდში. მოქალაქეები ირჩევენ აშშ-ის კონგრესის ორ პალატას — წარმომადგენელთა პალატასა და სენატს, ხოლო ზოგიერთ შტატში გუბერნატორსაც ირჩევენ.

ვირჯინიის უნივერსიტეტის პოლიტიკური ცენტრის საარჩევნო ანალიტიკოსის, ჯ. მაილს ქოულმენის განმარტებით, შუალედური არჩევნები ხშირად წარმოადგენს რეფერენდუმს მოქმედი პრეზიდენტისა და მმართველი პარტიის მიმართ. Deutsche Welle-ის ცნობით, პრეზიდენტ დონალდ ტრამპის რეიტინგი ამჟამად რეკორდულად დაბალ ნიშნულზეა. წარმომადგენელთა პალატის ყველა, 435-ვე ადგილი საარჩევნოა, ხოლო წევრები ორწლიანი ვადით აირჩევიან. სენატს ჰყავს 100 წევრი — თითოეული შტატიდან ორი სენატორი, რომელთა მანდატი ექვს წელს გრძელდება. ამ შუალედურ არჩევნებზე 35 სენატორული ადგილია წარმოდგენილი. გარდა ამისა, 36 შტატის ამომრჩეველი გუბერნატორს ირჩევს.

ამჟამად კონგრესის ორივე პალატაში რესპუბლიკელებს აქვთ უმრავლესობა, თუმცა მცირე უპირატესობით. წარმომადგენელთა პალატაში რესპუბლიკელებს 218 დეპუტატი ჰყავთ, დემოკრატებს — 214, ხოლო ერთი დამოუკიდებელია, რომელიც ძირითადად რესპუბლიკელებს უჭერს მხარს. სენატში 53 რესპუბლიკელია, 45 დემოკრატი და ორი დამოუკიდებელი სენატორი, რომლებიც ძირითადად დემოკრატებს უჭერენ მხარს. ხმების თანაბრად (50:50) გაყოფის შემთხვევაში გადამწყვეტ ხმას აფიქსირებს აშშ-ის ვიცე-პრეზიდენტი, რის გამოც ამჟამად ტრამპის ვიცე-პრეზიდენტ ჯეი დი ვენსს შეუძლია სასწორის გადაწონვა. დამკვირვებლების პროგნოზით, მოსალოდნელია, რომ დემოკრატები წარმომადგენელთა პალატაში უმრავლესობას მოიპოვებენ. კონგრესის მხარდაჭერა გადამწყვეტია ფედერალური პოლიტიკური გადაწყვეტილებების მისაღებად, რის გამოც უმრავლესობის მოპოვება მნიშვნელოვნად განსაზღვრავს ტრამპის პოლიტიკურ კურსს.