რუსეთის მიერ უკრაინის ზაპოროჟიეს ოლქის დასახლება კომიშუვახაში მდებარე სკოლის შენობაზე მიტანილი საჰაერო დარტყმის შედეგად დაღუპულთა რაოდენობამ 40-ს მიაღწია. სააგენტო APA-ს ცნობით, ამის შესახებ უკრაინის პრეზიდენტმა ვოლოდიმირ ზელენსკიმ „ტელეგრამის“ საკუთარ გვერდზე განაცხადა.

ზელენსკის თქმით, ზოგიერთი ცხედრის იდენტიფიცირება ჯერჯერობით შეუძლებელია. მან აღნიშნა, რომ 30-ზე მეტი ადამიანი შესაძლოა, კვლავ ნანგრევების ქვეშ იყოს.

უკრაინის ლიდერის განცხადებით, რუსმა სამხედროებმა დასახლებაში ცხრა საავიაციო ბომბი ჩამოაგდეს. თავდასხმის დროს პირველი დარტყმები ჰუმანიტარული დახმარების მისაღებად სკოლაში მისულ ადამიანებზე, ხოლო შემდეგ — ადგილზე დასახმარებლად მისულ მაშველებსა და პოლიციის თანამშრომლებზე მიიტანეს.