ევროკომისიამ ევროკავშირის გაფართოების პოლიტიკის შესახებ ყოველწლიური ანგარიში და საკომუნიკაციო დოკუმენტი გამოაქვეყნა, რომელშიც აღნიშნულია, რომ საქართველოში დემოკრატიული უკუსვლა და ფუნდამენტური უფლებების შელახვა გრძელდება, ხოლო ქვეყნის ევროინტეგრაციის პროცესი „ფაქტობრივად შეჩერებულია“. ევროკავშირის უმაღლესი წარმომადგენლის, კაია კალასის განცხადებით, საქართველო ევროკავშირთან კონფლიქტურ გზაზე იმყოფება და თუ ხელისუფლება კურსს შეიცვლის, ინტეგრაციის პროცესი შესაძლოა განახლდეს.

დოკუმენტის თანახმად, საქართველო „კანდიდატი ქვეყანაა მხოლოდ სახელით“ და ვერ სარგებლობს იმ სიკეთეებით, რასაც კანდიდატის სტატუსი და გაწევრიანამდელი პროცესი ითვალისწინებს. ევროკომისიამ ხაზგასმით აღნიშნა, რომ ხელისუფლებამ არ გადადგა ნაბიჯები დემოკრატიისა და ფუნდამენტური უფლებების მდგომარეობის გამოსასწორებლად, რამაც ადრე დიპლომატიური და სამსახურებრივი პასპორტების მფლობელთათვის უვიზო რეჟიმის შეჩერება გამოიწვია, ხოლო ახლა ზოგადად უვიზო მიმოსვლის რეჟიმს უქმნის საფრთხეს.

ანგარიშში ასევე საუბარია სამოქალაქო სივრცის შეზღუდვებზე, პოლიტიკურ პოლარიზაციასა და მედიის მდგომარეობაზე. ევროკომისიის ცნობით, ოქტომბრის მუნიციპალური არჩევნები ღრმად კომპრომეტირებულ პოლიტიკურ და საარჩევნო პირობებში ჩატარდა, ხოლო ქვეყანაში მიღებულმა რეპრესიულმა კანონებმა, მათ შორის უცხოური გავლენის გამჭვირვალობის შესახებ კანონმა და „ოჯახური ღირებულებებისა და არასრულწლოვანთა დაცვის“ საკანონმდებლო პაკეტმა, ფუნდამენტური უფლებები სერიოზულად შეზღუდა.

ევროკომისია მოუწოდებს საქართველოს ხელისუფლებას, სასწრაფო ზომები მიიღოს დაპატიმრებული პოლიტიკოსების, ჟურნალისტებისა და აქტივისტების გასათავისუფლებლად, გააუქმოს ფუნდამენტური უფლებების შემზღუდველი კანონმდებლობა და უზრუნველყოს ვიზალიბერალიზაციის სამოქმედო გეგმისა და ვიზის შეჩერების მექანიზმის მეშვიდე და მერვე ანგარიშების რეკომენდაციების შესრულება. ამასთან, დოკუმენტის მიხედვით, საქართველოს ერთგულება ევროკავშირის საერთო საგარეო და უსაფრთხოების პოლიტიკისადმი კიდევ უფრო შემცირდა და 38%-ს შეადგენს.